کۆبوونەوەی نێوان شاندی پارتى دیموکراتى کوردستان و یەکێتیى نیشتمانیى کوردستان لە پیرمام دەستیپێکرد و تەوەرى سەرەکى کۆبوونەوەکە گفتوگۆکردنە لەسەر پێکهێنانى حکومەتى داهاتووى هەرێم.
بەپێی زانیارییەکان، لە کۆبوونەوەکەدا هەردوولا گفتوگۆ لەسەر بەشداریکردن لە حکومەتى داهاتوو و چۆنیەتى دابەشکردنى پۆستەکان دەکەن.
هاوکات میدیای یەکێتی ڕایگەیاند: لە کۆبوونەوەکەدا پێکهێنانى حکومەت بەهەموو پاکێجەکانیەوە باس دەکرێت و هەردوولاش پاکێجیان بۆ بەشداریکردن لە حکومەت ئامادەکردووە و رادەستى یەکترى دەکەن.
بەگوێرەى زانیارییەکان، پارتى دیموکراتى کوردستان لە پاکێجەکەیدا داواى پۆستەکانى سەرۆکى حکومەت، سەرۆکى هەرێمى کوردستان و وەزارەتى ناوخۆ دەکات، لەبەرامبەردا یەکێتیى نیشتمانیى کوردستان، داواى پۆستەکانى سەرۆکى حکومەت دووساڵ بەدووساڵ، سەرۆکى هەرێمى کوردستان و سەرۆکى پەرلەمانى کوردستان دەکات.
رۆژى شەممە 30ی تشرینی یەکەمى 2024، یەکەم کۆبوونەوەى شاندى پارتى دیموکراتى کوردستان و یەکێتیى نیشتمانیى کوردستان لە سلێمانى بەڕێوەچوو، بەگوێرەى راگەیەندراوى کۆبوونەوەکە “هەردوولا ئامادەییان دەربڕی بۆ درێژەدان بەکۆبوونەوەکانی نێوانیان”.
پارتى دیموکراتى کوردستان، 39 کورسى خولى شەشەمى پەرلەمانى بەدەستهێناوە و یەکێتیى نیشتمانیى کوردستان 23 کورسى بەدەستهێناوە، هەردوولاش شاندى دانوستانکارییان پێکهێناوە و لەگەڵ لایەنەسیاسیەکانى دیکەش کۆبوونەتەوە.
ئەمە دەبێتە دووەم كۆبوونەوەی هەردوو شاندی دانوستانکاری پارتی و یەكێتی بۆ تاوتوێكردنی پێكهێنانی کابینەی دەیەمی حکوومەتی هەرێمی کوردستان لەو کاتەوەی هەڵبژاردنی پەرلەمانی كوردستان کراوە، کۆبوونەوەی یەکەمی نێوان هەردوو شاند، له 30ـی11ی2024ی مانگیش ڕابردوو لە سلێمانی بەڕێوە چوو.
