گرووپە چەکدارەکانى نزیک لە تورکیا ئاگربەستیان لە ناوچەکانى مەنبج و دەوروبەرى راگەیاند، و هەسەدەش مەزارگەی سلێمان شا ڕادەست دەکات.
بەپێی بڵاوکراوەیەکی گرووپە چەکدارەکانی سەربە تورکیا، بڕیار دراوە لە مەنبج و دەوروبەری ئاگربەست ڕابگەیەندرێت و لەو ماوەیەدا هێزەکانی سووریای دیموکرات( هەسەدە ) دەکشێنەوە.
بەپێی بڵاوکراوەکە، ئاگربەستەکە بۆ ماوەى چوار رۆژە و سەرجەم هێزەکان لە ناوچەى بەنداوى تشرین دەکشێنەوە.
هەربەپێی ئاگربەستەکە، ئەوهێزەی سەرپەرشتی بەنداوەکە دەگرێتە ئەستۆ، بەڕێوەبەرایەتیى بەنداوەکەوە دەبێت و ڕادەستی ئەو دەکرێت.
هاوکات لە ئاگربەستەکەدا هاتووە، هەسەدە مەزارگەى سڵێمان شا رادەست دەکات.
ئەم ئاگربەستە لەکاتێکدایە لەماوەی چەند ڕۆژی ڕابردوودا بەهۆی هێرشەکانی تورکیا و گرووپە چەکدارەکانی مەترسی ڕووخانی بەنداوی تشرین دەکرا، لەئەگەری ڕووخانی بەنداوەکە زەرەرو زیانێکی زۆری گیانی و ماڵی بەر گووندەکانی دەورووبەری مەنبج و ڕۆژئاوای کوردستان دەکەوت.
