دارایی بڕیارێكی بۆ تەمەنی خانەنشینی فەرمانبەران دەركرد

وەزارەتی دارایی هەرێم سەبارەت بە تەمەنی خانەنشینی فەرمانبەران ڕایگەیاندووە، لە ماوەی 15 ڕۆژدا و بێ دواكەوتن، ئەو فەرمانبەرانەی كە تا رێكەوتی 2025/12/31 تەمەنی یاساییان دەبێتە 60 ساڵ بە لیستێك ڕەوانەی وەزارەت بكرێت.

بەپێی گشتاندنێكی وەزارەتی دارایی و ئابووری حكومەتی هەرێمی كوردستان، كە دوێنی دوو شەممە 9ی كانوونی یەكەمی 2024 بە واژۆی ئاوات جەناب نووری، وەزیری وەزارەتەكە ئاڕاستەی وەزارەتەكان و فەرمانگەكان كردووە، لەبارەی ئەو فەرمانبەرانەی لە یاسای ڕاژەی سەربازی و شارستانین و تاكو ڕێكەوتی 31/12/2025 ماوەی تەمەنی یاساییان دەبێتە 60 ساڵ لەسەر میلاكتان بۆمان ڕەوانە بكەن بەپێی خشتەی هاوپێچ.

بەپێی گشتاندنەكە، لە ماوەی 15 ڕۆژ دوای گشتاندنی وەزارەتی دارایی و ئابووری، بێ دواكەوتن ناوەكان ڕەوانەی وەزارەت بكرێت.

هەرچەندە گشتاندنەكەی وەزارەتی دارایی و ئابووری هیچ وردەكارییەكی لە پڕۆسەكەدا ڕوون نەكردووەتەوە، بەڵام پێدەچێت بە مەبەستی وەرگرتنی ژمارەی ئەو فەرمانبەرانە بێت، كە تەمەنیان دەگاتە خانەنشین بوون، چونكە تەمەنی یاسایی خانەنشینبوون لە عێراق 60 ساڵە و هەوڵێك هەیە بكرێتە 63 ساڵ، كە لە هەرێم تاوەكو ئێستا 63 ساڵە.