وەزیری پێشمەرگەی حكومەتی هەرێمی كوردستان جەخت لە خێراكردنی هەنگاوەكانی چاكسازی دەكاتەوە بۆ “بنیاتنانی سوپایەكی نیشتمانی یەكگرتووی كوردستانی” و دەڵێت: گۆڕانکاریەکان و هەل و مەرجی ئێستاش وادەخوازێت ئەم ئامانجە نیشتمانییە باڵایە بە زوویی بەدیبهێنرێت.
شۆڕش ئیسماعیل، وەزیری پێشمەرگە لە هەژماری خۆی بڵاویكردەوە، لەگەڵ سەرۆکی ئەرکان و ئەمینداری گشتیی و فەرماندەی فەرماندەیی هێزەکانی ٧٠ و ٨٠ـی هێزی پێشمەرگە، بە گرنگیەوە باردۆخی ئێستای هێزی پێشمەرگە و کاروبارەکانی پرۆسەی چاکسازی و رێکخستنەوە و یەکخستنەوەی هێزی پێشمەرگەی کوردستانمان لە چوارچێوەی دوو سەرکردایەتی ناوچەیی و ١١ فیرقەی سەربازیدا تاوتوێکرد.
جەختی كردەوە، پێویستە هەنگاوەکانمان خێراتر و چڕتر بکەینەوە بۆ سەرخستنی پرۆسەی چاکسازی و بەدیهێنانی ئامانجەکانی چاکسازی و بنیاتنانی سووپایەکی نیشتمانی یەکگرتووی کوردستانی، کە پارێزگاری لە خاک و خەڵکی کوردستان بکات لە هەر مەترسییەک، کە لە ئێستا و ئایندەدا ڕووبەروومان دەبێتەوە.
دەشڵێت: بێگومان گۆڕانکاریەکان و هەل و مەرجی ئێستاش وادەخوازێت ئەم ئامانجە نیشتمانییە باڵایە بە زوویی بەدیبهێنرێت.
