کۆمسیۆنی عێڕاق لەسەر نەدانی پارەی کارمەندانی سەر سندوقی دەنگدان هاتە دەنگ و دەڵێت” وەزارەتی دارایی هەرێم دابەشی نەکردووە”.
جومانە غەلای، وتەبێژی کۆمسیۆنی باڵای هەڵبژاردنەکانی عیراق بە سایتی فەرمی یەکێتی ڕاگەیاندووە، بەغدا ئەو پارەیەی کە بۆ کارمەندانی کۆمسیۆن دانرابوو ڕەوانەی هەرێم هەردووە، و لە ئێستادا بڕی پارەی پێویست لەبەردەستی وەزارەتی دارایی هەرێمی کوردستاندایە.
ئاماژەی بەوەشداوە، زیاتر لە 40هەزار کارمەند بەشدارییان لەبەڕێوەبردنی هەڵبژاردنی پەرلەمانی کوردستان کردووە، کە سەرجەمییان لە فەرمانبەری حکومەت و دەرچووانی زانکۆ و پەیمانگاکان و فەرمانبەری یەدەگ پێکهاتبوون.
بەپێی وتەی جومانە غەلای، هەر کارمەندێکی حکومەت کە بەشداری لەبەڕێوەبردنی رۆژی دەنگدناندا کردبێت بڕی 150هەزار دیناری پێ دەدرێت، هاوکات دەرچووی زانکۆ و پەیمانگاکان 250هەزار و فەرمانبەری یەدەگ 50هەزار دینار وەردەگرێت.
نزیکەی دوو مانگە هەڵبژاردنی پەرلەمانی کوردستان کۆتاییهاتووە و تا ئێستا هیچ وادەیەک بۆ پێدانی شایستەکانی کارمەندانی سەر سندوق ڕانەگەیەندراوە، هاوکات زیاتر لە 42 هەزار فەرمانبەر و خویندکاری دەرچووی زانکۆ و پەیمانگەکان وەک کارمەندی کاتی سەر سندوقەکانی دەنگدانی تایبەت لە 18ـی تشرینی یەکەمی 2024 و دەنگدانی گشتی 18ـی تشرینی یەکەمی 2024ـی پەرلەمانی کوردستان کاریان کرد، کە بۆ هەر کارمەندێک بەپێی ئەرکەکەی بڕێک پاداشتی بۆ خەرجدەکرێت.
