بۆ تاوتوێکردنی پەرەسەندنی دۆخی سووریا، وەزیری دەرەوەی ئێران سەردانی بەغداد دەکات.
ئەمڕۆ چوارشەممە، ئاژانسی هەواڵی تەسنیم بڵاویکردەوە، ڕۆژی هەینی داهاتوو عەباس عێراقچی، وەزیری دەرەوەی ئێران بە مەبەستی کۆبوونەوە و ڕاوێژ لەگەڵ بەرپرسانی باڵای عێراق، سەردانی بەغداد دەکات.
سەردانەکە لە چوارچێوەی ئەو گەشتە هەرێمییە دێت کە وەزیری دەرەوەی ئێران بە هۆی دۆخی سووریاوە دەستیپێکردووە و لەم هەفتەیەشدا سەردانی دیمەشق و ئەنقەرەی کرد.
پێشتر وەزیری دەرەوەی ئێران ڕایگەیاندبوو، ئەمریکا و ئیسرائیل لە پشت ئەو دۆخەوەن کە لە سووریا هاتووەتە ئاراوە، ئەویش دوای ئەوەی گروپە چەکدارەکانی سەر بە تورکیا دەستیان بەسەر چەند شار و شارۆچکەیەکدا گرت.
