سەرۆكی فراكسیۆنی یەكگرتوو لە پەرلەمانی كوردستان ڕایدەگەیەنێت، لەبری ڕێکكەوتن لەسەر پلە و پۆست، با ڕێکكەوتن لەسەر بژێوی و مووچە بکەن و خەمی بخۆن.
مستەفا عەبدوڵا، سەرۆکی فراکسیۆنی یەکگرتوو لەدوای سوێندخواردنیان وەك ئەندامی خوولی شەشەمی پەرلەمانی كوردستان بۆ میدیاكان وتی،” بۆ هەڵبژاردنی دەستەی سەرۆكایەتی پەرلەمانی كوردستان دەیانەوێت ڕێككەوتن بكەن و بەپێی پەیڕەو نەڕۆن و لایەنە دەسەڵاتدارەكان لەبری كاركردن بە پەیڕەوی ناوخۆ دەیانەوێت كارەكە بە ڕێككەوتن بكەن، بۆیە بڕیارماندا دەنگ بە دەستەی سەرۆكایەتی نەدەین و ببینە هێزێكی ئۆپۆزسیۆن”.
ڕاشیگەیاند، “لەبری ڕێکكەوتن لەسەر پلە و پۆست، با ڕێکكەوتن لەسەر بژێوی و مووچە بکەن و خەمی بخۆن و ڕێككەوتن لەسەر ئەو هەموو قەیرانە قوڵانە بكەن، كە فەرمانبەر مووچەی نییە و خەریكە بایكۆت دەستپێدەكاتەوە”.
جەختیشی كردەوە، دەبوو بەشێوازێكی یاسایی دەستەی سەرۆكایەتی پەرلەمان هەڵبژێردرێت، بەڵام حزبە دەسەڵاتدارەكان كردوویانە بە یەك پاكێج لەگەڵ پێكهێنانی حكومەت، كە ئەوەش كارێكی نایاساییە.
