شارەزایەكی كەشناسی پێشبینییەكانی بۆ دۆخی كەشوهەوای ئەم مانگە بڵاودەكاتەوە و ڕایدەگەیەنێت، كەشێكی وشك و خۆرەتاو و كەم باران ناوچەكەمان دەگرێتەوە و دەشڵێت: پلەكانی گەرما بەرزدەبنەوە.
ئاراس جەبار، شارەزای كەشناسی بۆ (خەڵك) ڕایگەیاند، بەگشتی پێشبینی ئەکرێت ئەم مانگە ڕێژەی ھاتنی شەپۆلەکانی باران بۆ ناوچەکانمان ژمارەیان کەمبێت و زیاتر کەشی وشک و کاریگەری ناوچە پەستان بەرزەکان چالاکتربن.
ڕاشیگەیاند، ماوەی خۆرەتاوی ڕۆژەکان زیاتر ئەبێت و بارانبارین بەرێژەیەکی بەرچاو کەمتر ئەبێت لە ئاست تێکڕاییەکانی بەتایبەت لەناوچەکانی ھەرێمی کوردستان وشکیەکی زیاتر بەدی دەکرێت ھەروەھا لەزۆربەی ناوچەکانی عێراق و باکوری کوردستان و تورکیا و ئێران و باکوری سعودیە بە کەشێکی وشک و کەمباراندا تێپەردەبێت و پلەکانی گەرما بەرێژەیەکی کەم لەسەروو تێکراییەکانی ئەبێت.
ئاماژەی بەوەشكرد، لەکۆتایی ئەم ھەفتەوە پلەی گەرمی بەرزبوونەوەی زیاتر بەخۆیەوە ئەبینێت و ئەگەریش ھەیە ناوەراستی ھەفتەی داھاتوو لە 9/12/2024 بارانبارین دەستپێبکاتەوە.
