سەرۆکوەزیرانی عێراق پەیوەندییەکی تەلەفۆنی لەگەڵ رەجەب تەیب ئەردۆغان سەرۆککۆماری تورکیا ئەنجامدا و گفتوگۆیان لەسەر پەیوەندی نێوان ئەو دوو وڵاتە لەبارەی سامانی ئاو و ئاسایشی سنور کرد.
نوسینگەی سەرۆکوەزیرانی عێراق، لە راگەیەندراوێکدا بڵاویکردووەتەوە، لە پەیوەندییەکی تەلەفونیدا محەمەد شیاع سودانی سەرۆکوەزیرانی عێراق و رەجەب تەیب سەرۆک کۆماری تورکیا باسیان لە هەوڵەکانی هەردوولا بۆ پاراستنی سنووری هاوبەش و هەماهەنگی لە رووبەڕووبوونەوەی چەکداران کردووەتەوە.
بە گوێرەی راگەیەندراوەکە لە پەیوەندییەکەدا باس لە پێداچوونەوە بە پشکی عێراق لە ئاوی رووباوری دیجلە و فورات کراوە و هاوکات هەماهەنگی بوارەکانی بازرگانی و وەبەرهێنان و بەشداریکردنی کۆمپانیا تورکییەکان لە پڕۆژەی ژێرخانە ئابورییەکانی عێراق دووپاتکرایەوە و باس لە پێکەوەبەستنی هێڵی ئاسنینی نێوان بەندەری فاو لە بەسرە و ناوچەکانی تورکیا کرا.
