بۆ مێژوو…كەتنێكی گەورەی دەسەڵاتدارانی سعودیە و بێ هەڵوێستییەكی گوماناوی!

پ. د. سەعید عەلی محەمەد

چەند ڕۆژێك لەمەوبەر لە شاری (ریاز)ی پایتەختی سعودیە بە سەرپەرشتی و چاودێری لایەنی فەرمیی و حكومیی ئەو وڵاتە ڕێوڕەسمێك یان ڕوونتر بڵێین ڤیستیڤاڵێكی تایبەت بە نمایشكردنی چەند جل و بەرگ و مۆدێلە پۆشاكێكی خۆرئاوایی بەڕێوەچوو! ئەوەی لە وێنە و دیمەنەكانی ئەو ڤیستیڤاڵە ئابڕووبەرەدا بینراو هەمووانی توشی شۆك كرد چوارچێوە و هەیكەلێكی هاوشێوە و نزیك لە هەیكەل و شێوەی كەعبەی پیرۆز بوو، كە دەیان ئافرەتی نیمچە ڕووتی هێنراو لە ئەوروپاوە بە دەوریدا دەسوڕانەوە، هەروەها لە كەشێكی دوور لە هەموو عورف و نەریت و ڕێسایەكی ئیسلامیی و كۆمەڵایەتیی بە گشتی و، كۆمەڵگەی سعودیی بە تایبەتی ، پارەو دۆلارێکی ئێجگار زۆرو لەڕادەبەدەر لە لایەن ئامادەبووانەوە كە زۆربەیان بەرپرسانی سعوودیی ڕێكخەری ئاهەنگەكە بوون بەسەر  میوانەكاندا دەبارێنراو دەبەخشرایەوە، وەك ڕەزامەندیی و خۆشی دەربڕین بەرانبەر بە ئەداو سەمای ئافرەتانی سەماكەری نیمچەڕووتی سەر سەكۆی ڤیستیڤاڵەكە!

بێگومان ڕووداوێكی لەو جۆرە حاڵەت و دیاردەیەكی تەواو زەق و نامۆ و ناسروشتی و تایبەت بوو، كە هیچ جۆرە ماناو لێكدانەوەیەكی تر جیاواز لە مەغزاو دیمەنە بینراوە ئابڕووبەرەكان هەڵناگرێ، واتە ئەوانەی ئەو گردبوونەوە و ئاهەنگەیان ڕێكخستبوو كەسانێكی نەفام و بێ ئاگا نەبوون لە ناوچەیەكی چۆڵەوانی دوور لە وڵاتی موسڵمانانەوە ژیابن، بەڵكو ئەو ڤیستیڤاڵە فۆڕم و ناوەڕۆك ئەوروپیە لەلایەن دەزگاو دامەزراوەیەكی فەرمیی و حكومیی و ڕێگەپێدراوەوە سەرپەرشتی دەكرا كە ڕاستەوخۆ فەرمان لە (موحەمەد بن سەلمان)ی یاریدەدەری پادشای سعوودیە وەردەگرێ !

لە هەمووی سەیرو سەمەرەتر ئەوەیە ڕۆژان تێپەڕیان كرد كەچی نەمانبینی و نەمانبیست هیچ جۆرە دامەزراوەیەكی گەورەی شەرعیی لە وڵاتانی ئیسلامیدا قسەیەك لەسەر ئەو كەتنە گەورەیە بكەن!

نەمانبینی و نەمانبیست هیچ دامەزراوەیەكی زانستیی شەرعیی وەك: (یەكێتی جیهانی زانایانی موسڵمان) ، یان (ئەزهەر) ، یان (زەیتونە) ، یان (قەرەوین) ، یان هیچ دەستە و تاقم و كۆمەڵەیەكی سۆفیی ، یان پارتێك لە پارتە ئیسلامییەكانی جیهانی ئیسلامیی بێنە دەنگ و، هیچ نەبێ بۆلەکەدارنەبوون و پاراستنی ئاوی دەم و چاوی خۆشیان بێت بەیاننامەیەكی ڕیسواكردن یان ئیدانەكردن دەربكەن!

جێی پرسیارو سەرسوڕمانیشە سەدان و هەزاران زانای سوڵتان لەو وڵاتە پیرۆزەدا، لەو خاكەدا كە پێغەمبەر و هاوەڵەكانی لەسەری ژیاون و لەدایك بوون و سەراپای ژیانیان بۆ خزمەتكردن و گەیاندنی ئاینی ئیسلام و پاراستنی پیرۆزییەكانی دین تەرخان كرد لەو خاكەوە، ئێستاكە لە ئاست هەوڵەكانی دەسەڵاتداران بۆ (داڕنینی وڵات و كۆمەڵگەی سعودیی لە ئایین و بەها ئەخلاقیە بەرزەكان و پێناسەی ئایینی و ئیسلامیی و عەقائیدیی خۆی) هاوشێوەی بێدەنگی مردووەكانی نێو گۆڕستانەكان نقەیان لەخۆیان بڕیووە و، لەپێناو پاراستن و لەدەستنەدانی بەرژەوەندییە تایبەتە ماددی و دنیاییەكانیان دەستیان بەكڵاوە شڕەی سەریانەوە گرتووە و بێدەنگیان هەڵبژاردووە!

لەولاشەوە كۆمەڵێ بەناو زاناو سەلەفی ساختەی دەست لە پشت دراوی دەسەڵات و دەزگا ئەمنییەكان لە سەكۆ و حەرەمی مەككە و مەدینەوە هەوڵ بۆ شەرعاندن و پینەكردنی ئەم ڕیسوایی و كەتنە نا ئەخلاقییە بدەن و، ڕووی دەسەڵات سپی بكەن و، هانی خەڵك و جەماوەریش بدەن بێدەنگی هەڵبژێرن و لە ماڵەكانیاندا بمێننەوە و، هەر جۆرە وەستانەوە و دژایەتی كردن و ناڕەزایەتی دەربڕین دژی بڕیارەكانی دەسەڵاتیش بە حەرام و گوناھ  وەسف بكەن!

مەعلومە كاتێك حاكمە دەسەڵاتدارە تەمەن (38) ساڵییەكەی وڵاتی مەككە و مەدینە دەستەوسان و بێ توانایە لەڕووخاندنی كەعبەی پیرۆز، ئەوا بە فەرمانی ڕاستەوخۆی ئیبلیس و ئیسرائیل و ئەتباعەكانیان هەوڵی سووك كردن و بێ نرخ كردن و هەڵتەكاندنی مەعنەویی ئەو ڕەمزە گەورە و پیرۆزانە دەدات كە پێگە و كاریگەریی تایبەت و ڕۆحیی و ڕاستەوخۆیان لەسەر دڵ و دەروون و بیركردنەوەی هەر مرۆڤێكی موسڵمان هەیە لەسەر ئەم زەوییەدا بژی.

بۆیە بە ئاشكراو بێ هیچ شەرم و سڵەمینەوە و خەجاڵەتییەك لەبەردەم خوا و گەلی موسڵمانی سعوودیە و سەدان ملیۆن موسڵمانی ئەم جیهانە ، لەنێوان ماوەیەك بۆ ماوەیەكی تردا و، لەژێر پەردە و بیانووی (كرانەوە بەڕووی جیهانی نوێ) و (پێشخستنی كەرتی گەشتیاریی) و (پراكتیزەكردنی پڕۆژەی گەشەی ئابووریی) و (ڕەخساندنی زیاتری ئازادییەكان) و (خۆگونجاندن لەگەڵ سیستمی نوێی جیهانی)، لەڕێی تەرخانكردنی ملیارەها دۆلار لە داهات و سامانی وڵات ئەم جۆرە ئاهەنگ و ڕێوڕەسم و ڤیستیڤاڵە ئابڕووبەرانە لە شارە جیاجیاكانی سعودیەدا ڕێكدەخات! ئەمە جگە لە دروستكردنی باڵەخانەیەكی تایبەتی سینەمایی لە شاری مەككە كە بە گەورەترین باڵەخانەی سینەمایی دادەنرێ لە سعوودیە و وڵاتانی كەنداودا! هاوكات گەمارۆدان و خنکاندنی خودی (كەعبەی پیرۆز) بە چەندین ئوتێلی گەشتیاریی و بازاڕی گەورەی سەرنج ڕاكێشی دیزاین ئەوروپی، ئەمەش وەك هەوڵێك بۆ دابەزاندن و كەمكردنەوەی قیمەت و قورسایی و شكۆ و پیرۆزی كەعبە و، كاڵكردنەوەی كاریگەریی و مانا و ئاماژە قوڵەكانی ئەو ناوچە پیرۆزە لەسەر دڵ و دەروونی حاجیان و عەمرەكاران و ئەوانەی لە وڵاتانی جیهانەوە هاتوون و لەو شوێنەدا نیشتەجێ بوون و ماونەتەوە!

ئەگەر ئێمە چاوێكی خێرا بگێڕین بە ڕەوشی سیاسیی و كۆمەڵایەتیی و ئاینیی و ناوخۆیی سعودیە لەژێر سایەی دەسەڵات و فەرمانڕەوایەتی حاكمە گەنجە خۆسەپێنەكەی ئێستای ئەو وڵاتەدا، ئەو ڕاستییەمان بۆ دەردەكەوێ كە ئەم جۆرە هەنگاوانە بەشێكن لەو پڕۆژە و سیاسەتە مەترسیدارو قێزەونەی كە دیكتاتۆرە گەنجەكە پیادەی دەكات بۆ دژایەتی كردنی ڕابوونی ئیسلامیی و بەگژداچوونەوەی سەرجەم هێزە سیاسییە ئیسلامییەكانی وڵاتانی ناوچەكە و، گەمارۆدانی هەر جۆرە كارو جوڵە و چالاكییەكی ئیسلامیی كە لەگەڵ سیاسەتەكانی ئەمریكا و ئیسرائیل و ئاڕاستەی پڕۆژەكانیان لە ناوچەكەدا یەك نەگرێتەوە! یەكەم هەنگاوی فیعلی و كرداریی ئەم سیاسەتەش لە ساڵی 2017 وە دەستی پێكرد كاتێك دەزگا ئەمنییەكانی سعوودیە بە سەدان و هەزاران زانای گەورە و، بیرمەندی بەناوبانگ و، پێش نوێژو بانگخوازی ئیسلامیی كاریگەرو، مامۆستای زانكۆ و پیاوی ئەكادیمی و،  كەسایەتی كۆمەڵایەتیی و، ڕۆژنامەنووس و كادیری میدیایی و، مافناس و چالاكوانی مەدەنیان ڕاپێچی زیندانەكانی سعوودیە كردو، تا ئەم ساتەوەختەش ئەو هەڵمەتە ڕەشبگیریانە بە بەرچاو هەموو ڕێكخراوەكانی كۆمەڵگەی مەدەنیی و مافەكانی مرۆڤەوە درێژەیان هەیە!

(جارید كۆشنەر)ی زاوای (دۆناڵد ترەمپ)ی سەرۆكی هەڵبژێردراوی ئەمریكا لە یادەوەرییەكانیدا بەناونیشانی (Breaking History) دەڵێ:

(دوای سەركەوتنی ترەمپ لە ویلایەتی یەكەمیدا بەرپرسانی ئەمریكا داوایان لە سعوودیە كرد دەست لە یارمەتیدانی تیرۆر هەڵگرێ و، دۆسیەی تایبەت بە مافەكانی مرۆڤ چاكتر بكات و، ئەركە داراییەكانی سەرشانی خۆی جێبەجێ بكات لەبەرانبەر پاراستنی سعوودیە، هەروەها هەندێك هەنگاویش بۆ ئاساییكردنەوەی پەیوەندییەكان لەگەڵ ئیسرائیلدا بگرێتەبەر…. لە بەرانبەر ئەم داوایانەدا دەسەڵاتدارانی سعوودیە ئەمریكیەكانیان دڵنیاكردەوە كە لە داهاتوودا ئەمریكییەكان شۆك دەبن بەو چاكسازییانەی كە حكومەتی سعوودیە لەسەر دەستی (محمد بن سلمان) ئەنجامیان دەدات).

كۆشنەر دەڵێ: (دوای یەكەم چاوپێكەوتن لەنێوان ترەمپ و محەمەد بن سەلماندا، بە محەمەد بن سەلمانم ووت: هەمووان لە ئەمریكا پێم دەڵێن: تۆ شێت و گەمژەی متمانە بە محەمەد بن سەلمان دەكەیت!! محەمەد بن سەلمانیشلە وەڵامدا  پێی وتم  : قەت سەر شۆڕت ناكەم، پابەند دەبین بە بەڵێنەكانمان، لە داهاتوودا ئەو گۆڕانكارییانە دەبینن كە لە سعوویەدا ئەنجامیان دەدەین، ئەو گۆڕانكارییانەی كە سنووری خەیاڵ دەبەزێنن).

ئەم ڕاستییانە و ئەم لێدوانانە ئەوە دەسەلمێنن كە چیتر ئێستاكە سعوودیە ئەو قەڵا گەورە و ئەستوورەی ئیسلام و موسڵمانان نیە وەك هەندێك بڕوایان وابوو ، بەڵكو ئێستاكە ئەو وڵاتە بۆتە خەنجەرە ژەهراوییە گەورەكەی دەست ئەمریكا و ئیسرائیل بۆ لێدان لە ئیسلام و بەگژداچوونەوەی موسڵمانان و هەتك كردنی موقەدەسات و ڕەمزە ئاینییە پیرزەكان و، بەخۆرئاوایی كردنی كۆمەڵگەی سعوودیی و داڕنینی لە هەموو عورف و نەریت و بەهایەكی ئیسلامیی و ئەخلاقیی!

ڕۆژنامەنووسی بەناوبانگی ئەمریكی (   Bobwood ward     ) لە كتێبێكدا بەناونیشانی (Plan of attack / نەخشەی پەلامار)  کە ساڵی ٢٠٠٤ بلاوی كردۆتەوە دەڵێ:

• ئەوەی زیاتر هانی واشنتۆنی دەدا بۆ بەرپاكردنی جەنگ دژی عێراق ساڵی 2003 تەنها سعوودیە بوو!
• ئەوەی هەوڵ و كۆششی بێ وچانی خستەگەڕ بۆ لە گۆڕنان و شكستپێهێنانی شۆڕشەكانی بەهاری عەرەبی بەتایبەت لە میسرو یەمەن سعوودیە و ئیمارات بوون

(Bobwood ward) لە کتێبەکەیدا دەڵێ:

(  سەرۆکی دەزگای هەواڵگریی سعودیە  – بەندەر بن سوڵتان –پێنج مانگ پێش دەستپێکردنی شەڕ دژی عێراق ،  ڕاستەوخۆ داوای لە جۆرج بۆشی سەرۆکی ئەوکاتی ئەمریکاکرد پەلە بکات لە ڕوخاندنی سەدام حسێن دا ، ئامادەیی سعودیەشی نیشاندا بۆ بینینی ڕۆڵێکی سەرەکی لە داڕشتنەوەی سیستمی سیاسیی نوێی ناوچەکە دوای ڕوخاندنی دەوڵەتی عێراقی ).

لە کۆتاییدا دەمەوێ بڵێم  :  ئەوەی خستمانە ڕوو دڵۆپێک بوو لە دەریایەک لە ئابڕووچوونەکان و ناپاکیە شاراوەکان و ، سەفقە نهێنیەکانی پشت پەردەی دەسەڵاتدارانی سعودیە دژ بە وڵاتان و گەلانی ناوچەکە و ، پارچە پارچە کردنی خاکەکانیان و، شکست پێهێنانی شۆڕش و جوڵانەوەکانیان !!