ئەمڕۆ چوار شەممە لە یەكەم ڕۆژی قەدەغەی هاتووچۆدا پڕۆسەی سەرژمێری بەشێوەیەكی ئاسایی بەڕێوەچوو، وەزارەتی پلاندانانی عێراق، كە سەرپەرشتی تەواوی پڕۆسەكە دەكات دڵنیایی دەداتە مووچەخۆران و دەڵێت: سەرژمێری پەیوەندی بە بڕینی مووچەی چاودێری كۆمەڵایەتییەوە نییە.
لیژنەی باڵای سەرژمێری عێراق لە بەیاننامەیەكدا ئاماژەی بەوەكردووە، بەیانی ئەمڕۆ پڕۆسەی سەرژمێری دەستی پێ كردووە و ئەمڕۆ و سبەینێ بەبێ جیاوازی پڕۆسەەكە بەردەوام دەبێت و دوای 48 كاتژمێر لە گەیشتنی داتاكان ئەنجامی بەرایی سەرژمێری ڕادەگەیەنرێت.
ڕاشیگەیاندووە، لە ناوەندی پەیوەندییەكان نزیكەی 100 هەزار كارمەند لەبارەی سەرژمێرییەوە وەڵامی هاووڵاتیان دەدەنەوە.
لای خۆشیەوە، وەزارەتی پلاندانانی عێراق دەڵێت: سەرژمێری پەیوەندی بە بڕینی مووچەی چاودێری كۆمەڵایەتییەوە نییە.
هاوكات، وتەبێژی حكومەتی عێراق بۆ ڕۆژنامەنووسان وتی، “هاووڵاتیان پابەندی قەدەغەی هاتووچۆ و خۆتۆماركردنی سەرژمێرین”.
وتیشی، “عێراقییەكان سەقامگیری و گەشەپێدانی وڵاتیان دەوێت”.
