لەماوەی چەند ڕۆژێكی كەمدا و بەهۆی تووندبوونەوەی جەنگی ئۆكراینا و هەڕەشەی بەرپەرچدانەوەی ئەتۆمی لەلایەن ڕوسیاوە لەئەگەری بەكارهێنانی مووشكی دوورمەودای ئەمریكی لەلایەن ئۆكرایناوە، نرخی زێڕ بەشێوەیەكی بەرچاو بەرزبۆتەوە.
لە بازاڕەکانی هەرێمی کوردستان نرخی زێر بەرزبوونەوەی تۆمارکرد و بەراورد بە دوو ڕۆژی ڕابردوو هەر مسقاڵێک بڕی نزیكەی 15 هەزار دینار بەرزبۆتەوە.
دانا وەرتی، خاوەنی زێڕنگەری ئازوورا لە هەولێر بۆ (خەڵك) ڕایگەیاند، ئۆنسەی زێڕ گەیشتۆتەوە 2 هەزار و 632 دۆلار لە كاتێكدا لە چەند ڕۆژی ڕابردوودا دابەزی بۆ 2 هەزار و 536 دۆلار و بەوەش 98 دۆلاری چۆتەسەر.
ئاماژەی بەوەشكرد، نرخی یەك مسقاڵ زێڕی عەیار 24 بووە بە 645 هەزار دینار و عەیاری 21 بووە بە 564 هەزار و عەیاری 18 بووە بە 484 هەزار دینار.
