دوای ئەوەی لە ژمارەیەك پارێزگا سبەینێ كرایە پشوو بەهۆی سەرژمێری گشتییەوە هاوكات لەگەڵ پشووی دوو ڕۆژی قەدەغەی هاتووچۆ، بەڵام سەرچاوەیەكی باڵا لە حكومەتی عێراق ڕایگەیاندووە، هیچ بڕیار و ڕێنماییەك نییە سبەینێ لە سەرتاسەری عێراق بكرێتە پشوو.
ئەمڕۆ دوو شەممە، هەریەكە لە پارێزگاكانی كەركوك و موسەننا و كەربەلا و موسل ڕایانگەیاند، ڕۆژی سێ شەممە دەكرێتە پشووی فەرمی بۆ ئەوەی ئاسانكاری بۆ هاووڵاتیان و فەرمانبەران بكرێت بۆ گەڕانەوە بۆ ناوچەكانیان بە مەبەستی سەرژمێری گشتی.
میدیا عێراقییەكان لە زاری سەرچاوەیەكی باڵا لە دیوانی ئەنجوومەنی وەزیرانی عێراق بڵاویانكردەوە، “هیچ نیەتێك و ڕێنمایی و ڕاسپاردەیەك نییە بۆ ئەوەی بۆ سبەی سێ شەممە پشووی سەرتاسەری لە عێراق ڕابگەیەنرێت”.
سەرچاوەكە جەختیشی كردۆتەوە، پشووەكە تەنیا ڕۆژانی چوار شەممە و پێنج شەممەی ئەم هەفتەیە دەبێت.
وتوشیەتی، “حكومەتە خۆجێیەكان دەتوانن بڕیار لەسەر پشوو یا دەوامی خۆیان بدەن بە گوێرەی سروشتی پارێزگاكەیان و پێویستی بۆ ئاسانكاری پڕۆسەی سەرژمێری و باشتر بەڕێوەچوونی رێكارەكانی سەرژمێری”.
