بەرپرسێكی تۆماری بایۆمەتری ڕایگەیاند، ئەو فەرمانبەر و مووچەخۆر و كەمئەندامانەی تۆمار نەكراون، لەم دوو رۆژە تۆمار دەكرێن، ئەگەرنا مووچەی مانگی 10یان رادەگیرێت.
ژیار ئەكرەم، سەرپەرشتیاری بنكەكانی تۆماری بایۆمەتریی هەولێر، بە میدیای پارتی راگەیاند: “بەپێی بڕیاری وەزارەتی دارایی، تەنیا دوو رۆژ ماوە بۆ ئەو وادەیەی، كە بۆ ئەو مووچەخۆر و فەرمانبەرانە داندراوە، كە بایۆمەتری و كۆدی بێهاوتا بكەن، ئێمەش ئەو چەند رۆژە دەواممان كردووە بە دوو شەفتی بەیانییان و ئێواران، بۆ ئەوەی تەواوی مووچەخۆر و فەرمانبەران تۆمار بكرێن”.
ئاماژەی بەوەشدا، ژمارەیەکی زۆر كەمئەندام ماون هێشتا خۆیان تۆمار نەكردووە، دەشڵێت: “لە هەولێر نزیكی دوو هەزار كەمئەندام كێشەی بایۆمەتری و كۆدیان هەیە و لە ماوەی رابردوودا لە رێگەی بانكەكان و وەزارەتی كاروكاروباری كۆمەڵایەتی و رێكخراوەكانی كەمئەندامان هەوڵی زۆرمان داوە و پەیوەندیمان پێوە كردوون، بەشێكیان هاتوون، بەڵام هێشتا بەشێكیان نەهاتوون و وەڵامی پەیوەندییەكان نادەنەوە، یان ژمارە مۆبایلەكانیان هەڵەیە”.
ژیار ئەكرەم، داوای لەو كەمئەندامانە كرد، بە زووترین كات پەیوەندی بە بنكەكانی بایۆمەترییەوە بكەن، ئەگەرنا مووچەی مانگی 10یان بۆ خەرج ناكرێت، باسی لەوەشکرد: “ئێمە دەمانەوێت كێشەكانیان چارەسەر بكرێت و حەز ناكەین، كە مووچەی مانگی 10 راگەیاندرا، لە بانكەكان پێیان بوترێت مووچەتان خەرج ناكرێت”.
بەپێی راگەیاندراوی وەزارەتی دارایی و ئابووربی هەرێمی كوردستان، تا 20ی ئەم مانگە دەرفەت هەیە هەموو ئەو فەرمانبەر و مووچەخۆرانەی بە هۆکاری جیاواز لەدەرەوەی وڵاتن، یان لە مۆڵەتی بێ مووچەدان، یان لە مۆڵەتی خوێندندان، دەبێ خۆیان لە بایۆمەتری تۆمار بكەن.
