وەزارەتی گواستنەوەی عێراق ڕایدەگەیەنێت، لە ڕۆژانی سەرژمێریدا قەدەغەی هاتووچۆ گەشتە ئاسمانییەكان ناگرێتەوە و بە پێی خشتەكان بەردەوام دەبن.
مەیسەم سافی، وتەبێژی وەزارەتی گواستنەوەی عێراق بە ئاژانسی هەواڵی (العراقیە)ی ڕاگەیاند، لە ڕۆژانی سەرژمێریدا، بە هەماهەنگی لەگەڵ دەزگا ئەمنییەكان ئاسانكاری بۆ گەشتیاران دەكرێت و گەشتە ئاسمانییەكان بەردەوام دەبن.
ڕاشیگەیاند، گەشتی فڕۆكەخانەكان بەگوێرەی خشتەكان بەردەوام دەبن و قەدەغەی هاتووچۆ گەشتە ئاسمانییەكان پەك ناخات .
لای خۆشیەوە ئەحمەد هۆشیار، بەڕێوەبەری فڕۆكەخانەی نێودەوڵەتیی هەولێر، وتویەتی، “لە ڕۆژانی قەدەغەی هاتووچۆدا گەشتە ئاسمانییەكان بەردەوام دەبن”.
بڕیارە لە 20 و 21ی ئەم مانگە لە سەرتاسەری عێراق و هەرێمی كوردستان پرۆسەی سەرژمێری گشتیی دانیشتووان بەڕێوەبچێت و بەهۆیەوە قەدەغەی هاتووچۆ دەبێت.
