ئەپیکۆر ئامادەیی خۆیانی دەربڕی بۆ ڕوونکردنەوە و چارەسەری کێشەکانیان لەگەڵ حکومەتی هەرێم و ناوەند لەسەر پرسی هەناردەی نەوتی هەرێم.
ئەمڕۆ 14ـی تشرینی دووەم کۆمەڵەی پیشەسازی نەوتی کوردستان (ئەپیکۆر) لە تۆڕی ئێکس پۆستێکی بڵاوکردۆتەوە و تێیدا هاتووە ڕایگەیاند، دەرفەتێکی باشمان لە بەردەمدا بۆ جێبەجێکردنی داخوازییەکانمان لەڕێگەی هەمووارکردنەوەی یاسای بودجە، و ئامادەین بۆ دانووستانی بەرهەمدار لەگەڵ بەرپرسانی هەرێمى کوردستان و عێراق بۆ ئەوەى ڕوونکردنەوە لەبارەى وردەکاریی کێشەکان و چارەسەرکردنیان بخەنەڕوو.
ئاماژەی بەوەشداوە، هەوڵەکانمان بۆ چارەسەری گرفتەکان و دانوستان بۆ ئەوەیە پێش دەستپێکردنەوەی هەناردەی نەوتی هەرێم لە ڕێگەی تورکیاوە بگەنە ڕێککەوتن، چونکە لەموەی ڕاگرتنی نەوتی هەرێم تا ئێستا عێراق نزیکەی 22ملیار و 800 ملیۆن دۆلار زیانی بەرکەوتووە.
ئەمە لەکاتێکدایە لە 5ـی ئەم مانگە ئەنجوومەنی وەزیرانی عێراق، کۆبۆوە و لە کۆبوونەوەکەدا ڕەزامەندی نیشاندرا بۆ هەناردەکردنەوەی نەوتی هەرێمی کوردستان و هەمووارکردنەوەى مادەى 12ـى یاساى بودجە، هاوکات بڕیاریشدرا تێچووى بەرهەمهێنانى نەوت لە هەرێم بۆ 16دۆلار زیاد بکات.
