بریكاری پێشووی وەزارەتی دارایی عێراق ئاشكرای دەكات، بەردەوام بەغدا تێبینی لەسەر لیستی مووچەی فەرمانبەرانی هەرێم و دەشڵێت: دواكەوتنی مووچە کاریگەری لەسەر باری کۆمەڵایەتی هاووڵاتیانی هەرێم دادەنێت.
فازڵ نەبی، بریکاری پێشووتری وەزارەتی دارایی عێراق لە لێدوانێکدا بۆ (بغداد الیوم) سەبارەت بە دواکەوتنی ناردنی مووچەی فەرمانبەرانی هەرێم ڕایگەیاندووە: “کێشەی زۆر لەنێوان هەرێم و بەغدا هەیە، بەڵام دەبوو بە گوێرەی بڕیارەکەی دادگای فیدڕاڵی کێشەی مووچە چارەسەر بکرایە و وەزارەتی دارایی عێراق مووچەی فەرمانبەرانی هەرێمی بناردایە”.
ڕاشیگەیاند، “هەندێک لە کێشەکان دەرەنجامی هەڵەتێگەیشتنن، بەردەوام بەغدا تێبینی لەسەر لیستی مووچەی فەرمانبەرانی هەرێم هەبووە و هەموو مانگێکیش کێشەی نوێ سەرهەڵدەدات”.
فازڵ نەبی باسی لەوەشكرد، “هەدوولا لە کۆبوونەوەی داخراودا سەرجەم ئەو کێشانە یەکلابکەنەوە و بگەنە ڕێککەوتنی کۆتایی لەسەر ناردنی لیستەکان، بڕ و ژمارەکان”.
ئاماژەی بەوەشکردووە، “فەرمانبەران و مووچەخۆرانی هەرێم چاویان لەوەیە کەی بەغدا مووچەکانیان دەنێرێت، هەر دواکەوتنێکیش کاریگەری لەسەر باری کۆمەڵایەتی هاووڵاتیانی هەرێم دادەنێت”.
جەختیشی کردۆتەوە، “کێشەکان گەورەنین و دەتوانرێت چارەسەربکرێتن، بەو مەرجەی هەردوولا ویست و نیازی چارەسەرکردنیان هەبێت”.
ئەمە لەكاتێكدایە، كە ماوەی 10 ڕۆژ تێپەڕیوە لە مانگی 11 و هێشتا مووچەخۆرانی هەرێم مووچەی مانگی 10یان وەرنەگرتووە.
