وەزیری ئاوەدانکردنەوە و نیشتەجێکردنی هەرێم رێگای دەربەندیخان- کەلار بەسەردەکاتەوە و ڕایدەگەیەنێت، تاوەکو کۆتایی ئەمساڵ پڕۆژەکە تەواو دەکرێت.
دانا عەبدولکەریم، وەزیری ئاوەدانکردنەو ەو نیشتەجێکردن پڕۆژەی دروستکردن و قیرتاوکردنی ڕێگای دووسایدی (دەربەندیخان- کەلار)ی بەسەرکردەوە و لە کۆنگرەیەکی ڕۆژنامەوانیشدا ڕایگەیاند، مایەی خۆشحاڵیە پڕۆژەکە قۆناغی گرنگی بڕیوە و بەپێی ستاندارد و رەِوشە ئەندازیارییەکانی دیاریکرابو جێبەجێکراوە و 92%ی تەواو بووە.
ئاشكراشی كرد، تاوەکو کۆتایی ئەمساڵ پڕۆژەکە بەرێژەی ٩٩٪ تەواو دەکرێت و دواتر دەچێتە خزمەتی هاووڵاتیان.
پڕۆژەی دروستکردن و قیرتاوکردنی ڕێگای دووسایدی (دەربەندیخان- کەلار)، یەکێکە لە پڕۆژە ستراتیژییەکانی وەزارەتی ئاوەدانکردنەوە و نیشتەجێکردن و درێژییەکەی ٤١ کیلۆمەترە، لەنێو پڕۆژەکەدا ٣٥ پردی تێدایە، کە درێژییەکەیان بە چوون و هاتن دەگاتە پێنج کیلۆمەتر و زۆرینەیان تەواو کراون، ھاوکات پردی ئاوە خێری، کە گەورەترین پردە لەسەر ئاستی ھەرێمی کوردستان دەکەوێتە نێو پڕۆژەکەوە.
وەزارەتی ئاوەدانكردنەوە لە ڕاگەیەنراوێكدا ئاماژەی بەوەكردووە، پڕۆژەکە لەڕابردودا تەنھا لە ١٥٪ی تەواو کرابوو، بەڵام لە ماوەی دەستبەکاربونی کابینەی نۆیەم و لەئێستادا رێژەی ئەنجامدراو گەیشتوەتە زیاتر لە ٩٢٪، ھەر لە سۆنگەی خەمخۆری بۆ تەواوکردنی ئەم پڕۆژەیە و پڕۆژەکانی دیکەی وەزارەت، لەماوەی تەمەنی ئەم کابینەیەدا وەزیری ئاوەدانکردنەوە و نیشتەجێکردن زیاتر لە 10 جار بەشێوەی مەیدانی سەردانی سنورەکەی کردوە و بەدواداچوونی بۆ جێبەجێ کردنی پڕۆژەکان کردوە.
