بەهۆی تەقینەوەی ئۆتۆمبێلێک لە شنگال، دوو کەس گیانیان لەدەستدا و بەهۆی زۆری سووتانیانەوە، تەرمەکان ناناسرێنەوە.
دوانیوەڕۆی ئەمڕۆ لە كاتژمێر 2:30 خوولەك، ئۆتۆمبێلێك لەسەر ڕێگای چیای شنگال تەقیوەتەوە و تا ئێستا ناسنامەی كوژراوەكانی ناو ئۆتۆمبێلەكە و هۆكاری تەقینەوەكە ئاشكرانەكراوە.
حه‌یده‌ر شه‌شۆ، فەرماندەی هێزی پاراستنی ئێزدخان لە شنگال ڕایگەیاند، “لەسەر ڕێگەی چیای شنگال، ئۆتۆمبێلێک تەقییەوە و دوو سەرنشینی گیانیان لەدەستداوە.”
ڕاشیگەیاندووە، ئۆتۆمبێلەکە جۆری تایبەت بووە و دوو کەسی تێدا بووە، بەهۆی زۆری رێژەی سووتانیانەوە، دوو کەسەکە ناناسرێنەوە.
ئاماژەی بەوەشكردووە، “دیارنییە ئۆتۆمبێلەکە بە بۆمب تەقێنراوەتەوە یان بە فڕۆکە بۆردوومان کراوە.”
