پڕۆژەی هەژماری من ڕایدەگەیەنێت، لە ماوەی شەش مانگی ڕابردوودا 34 هەزار مووچەخۆر فۆڕمی بانكی (TBI)یان پڕکردۆتەوە و دەشڵێت: فەرمانبەران دەتوانن مووچەكانیان لە ڕێگەی بانكەوە وەربگرن.
پڕۆژەی هەژماری من بڵاویكردەوە، فەرمانبەران دەتوانن مووچەكانیان لە ڕێگەی بانكەوە وەربگرن و بە كارتەكانیان پارە لە (ATM) ڕابكێشن و لە شوێنەكانی فرۆشتن بەكاری بهێنن.
ڕاشیگەیاندووە، لە ماوەی شەش مانگی ڕابردوودا 34 هەزار فەرمانبەری هەرێمی كوردستان، فۆڕمیان پڕ كردۆتەوە تاوەكو لەرێگای بانكی (تی بی ئای) مووچەكانیان وەربگرن، كە زۆرترینی ئەو فەرمانبەر و مامۆستایانەی کە فۆڕمیان پڕکردووەتەوە لە سنووری پارێزگای سلێمانین.
ڕاشیگەیاندووە، لە ئێستادا، 10 هەزار كارت تەواو بووە و (TBI) لە چوارچێوەی پڕۆژەی هەژماری من دەیداتەوە بە مووچەخۆران و تاوەكو كۆتایی ئەمساڵیش 24 هەزار كارتی دیكەش تەواو دەبن و دەدەرێتەوە بە مووچەخۆران.
پێشتر، بانکەكە بڵاویكردەوە، بەگوێرەی بڕیاری دادگای فیدراڵی و لەسەر راسپاردەی محەمەد شیاع سودانی، سەرۆک وەزیرانی عێراق، گرێبەستێکیان بەمەبەستی بەبانکیکردنی مووچەی فەرمانبەرانی هەرێمی کوردستانی لەگەڵ هەژماری من واژۆکردووە و دوو لقی بانكی تی بی ئای لە سلێمانی و هەڵەبجە دەکرێنەوە.
