نرخی نەوتی خاو و برێنت لە بازاڕەکانی جیهان لە بەرزیدا بە جێگیری ماوەتەوە و بەرمیلێک نەوتی خاوی برێنتیش لە سەرو 75 دۆلارەوە مامەڵەی پێوەدەکرێت.
ئەمڕۆ سێشەممە، لە بازاڕەکانی جیهان نرخی بەرمیلێک نەوتی خاوی برێنت بە 75 دۆلار و پێنج سەنتە، هاوکات یەک بەرمیل نەوتی خاوی ئەمریکاش بە 71 دۆلار و 43 سەنت مامەڵەی پێوە دەکرێت.
دوێنێش، ئەندامانی رێکخراوی ئۆپیک پڵەس بەهۆی نیگەرانییەکانیان سەبارەت بە خراپتربوونی ئاماژە ئابوورییەکان و دابەزینی نرخی نەوت، زیادکردنی بەرهەمهێنانی نەوتیان بۆ مانگێکی دیکە دواخست و بڕیارە لە مانگی یەکی ساڵی ئایندە دەست بکەن بە زیادکردنی بەرهەمهێنانی نەوت.
ئەمەش دوای ئەوە دێت، رێکخراوەکە لە کۆبوونەوەی پێشووتریدا بڕیاری دابوو کە بەرهەمهێنانی نەوت لە مانگی 12ـی ئەمساڵ نزیکەی 180 هەزار بەرمیلی دیکە لە رۆژێکدا زیاد بکات.
