نوێنەری مامۆستایانی گرێبەست ئاشکرای کرد، کە پڕۆسەی بایۆمەتری بۆ مامۆستایانی گرێبەست دەستیپێکردووەتەوە و هەوڵ دەدەن لەم هەفتەیە کۆتایی پێبێت.
کاروخ عەبدوڵا، نوێنەری مامۆستایانی گرێبەست بە “تۆڕی میدیایی خەڵک”ی ڕاگەیاند: دوای ئەوەی پڕۆسەی بایۆمەتری خانەنشینان و کەمئەندامان کۆتایی هات، لەمڕۆ یەکشەممە پڕۆسەی بایۆمەتری بۆ مامۆستایانی گرێبەست دەستیپێکردووەتەوە و بڕیارە تا کۆتایی ئەم هەفتەیە بەردەوام بێت.
وتیشی: “ئەو بایۆمەترییە بۆ ئەوەیە مامۆستاکە هیچ دەوامێکی تری نەبێت و تەنیا مامۆستا بێت، بۆ ئەوەی هیچ کەسێک تۆمار نەکرێت کە زیاد لە مووچەیەکی هەبێت”.
کاروخ عەبدوڵا، ئەوەشی خستەڕوو: ئەوانەی مامەڵەی بایۆمەتری دەکەن، مەرجە کارتی نیشتمانیان هەبێت، وەک تاکە بەڵگەنامە بۆ رێگریکردن لە ساختەکاری و ئەگەری دووبارە نەبوونەوەی ناوی دووبارە.
بە وتەی کاروخ عەبدوڵا، نوێنەری گشتی مامۆستایانی گرێبەست، لە هەرێمی کوردستان 37 هەزار و 933 مامۆستای گرێبەست لە هەرێمی کوردستان هەیە.
