دەستەی گشتیی کەشناسیی و بوومەلەرزەی عێراق پێشبینییەکانی خۆی بۆ رەوشی کەشوهەوا بڵاوکردەوە و رایگەیاند، ئەمڕۆ و سبەینێ بارانبارین لە هەرێمی کوردستان بەردەوام دەبێت و بەرزترین رێژەی دابارینیش لە پارێزگای سلێمانی دەبێت.
بەگوێرەی راگەیەندراوێکی دەستەی کەشناسیی عێراق، لە ناوچەکانی عێراق بە گشتی تا نیوەڕۆی ئەمڕۆ بارانبارین بەردەوام دەبێت و پلەکانی گەرما نزمدەبنەوە.
هەر بەگوێرەی راگەیەندراوەکە، ئەمڕۆ و سبەینێ بارانبارینی بەلێزمە لە هەرێمی کوردستان بەردەوام دەبێت و بەرزترین رێژەی دابارین لە پارێزگای سلێمانی دەبێت، هەروەک پێشبینیی ئەوەشکراوە لە پارێزگاکانی دیالە، میسان، واست و پارێزگاکانی ناوچە سنوورییەکان لەگەڵ ئێران بارانی بە لێزمە ببارێت.
ئەمڕۆ لە بەشێک لە پەروەردەکانی هەرێمی کوردستان بەهۆی پێشبینییەکان بۆ ناسەقامگیریی کەشوهەوا و ئەگەری دابارینی رێژەیەکی بەرزی باران، خوێندن راگیراوە.
