وتەبێژی فراکسیۆنی یەکێتی لە پەرلەمانی عێراق ڕایگەیاند، بە خێرایی تەوتین بۆ مووچەخۆران نەکرێت، گرفتی مووچە سەرهەڵدەداتەوە.
سۆزان مەنسور، وتەبێژی فراكسیۆنی یەكێتی لە پەرلەمانی عێراق لە لێدوانێکی رۆژنامەوانیدا ئاماژەی بەوەداوە: بەگوێرەی ئەو ڕێككەوتنەی كراوە دەبێت تاكۆتایی ساڵ سەرجەم مووچەخۆرانی هەرێم لەیەكێك لەبانكە حكومییەكانی عێراق تەوتینیان بۆبكرێتەوە.
باسی لەوەشکردووە: ئەگەر بەخێرایی تەوتین بۆ فەرمانبەران نەكرێت، ئەوا لەدوای سەری ساڵەوە جارێکی دیكە گرفتی دواكەوتنی مووچە سەر هەڵدەداتەوە و گرفت بۆ مووچەی فەرمانبەران دروست دەبێت.
وتەبێژی فراکسیۆنی یەکێتی ئەوەشی وتووە: دەبێت لە ڕێگەی تەوتین لە بانكە فیدراڵییەكان مووچەی فەرمانبەران گەرەنتی بكرێت، چونكە پرۆژەی “هەژماری من” پرۆژەیەكی شەخسییە و پێچەوانەی بڕیارەكەی دادگای فیدراڵییە.
دەشڵێت: “ئێمە بەڵێنمان بەهاووڵاتیان و فەرمانبەران داوە كە بەرگریكاربین لە مووچەكانیان و نەهێڵین گرفت بۆ مووچەی فەرمانبەران دروست ببێت”.
