لە هێرشێكی مووشەكیی سوپای رووسیادا بۆ سەر ناحیەی شیڤچینكۆڤ سەر بە قەزای كوپیانسكی لە ناوچەی خاركێڤی رۆژهەڵاتی ئۆكراین، كەسێك گیانی لەدەست دا و حەوتی دیكەیش برینداربوون.
جێگری سەرۆكی نووسینگەی سەرۆكایەتی ئۆكراین، كیریلۆ تیمۆشینكۆ ڕایگەیاند، هێزەكانی رووسیا هێرشی مووشەكییان كردووەتە سەر ناحیەی شیڤچینكۆڤ و مووشەكەكان لە بازاڕی ناحیەكە كەوتوونەتە خوارەوە.
كیریلۆ تیمۆشینكۆ باسی لەوە كرد كە لە هێرشەكەدا، ژنێكی تەمەن ٦٠ ساڵان گیانی لەدەستداوە و حەوت كەسی دیكەش برینداربوون، تیمەكانی گەڕان و رزگاركردن بەردەوامن لەسەر كارەكانیان.
جێگری سەرۆكی نووسینگەی سەرۆكایەتی ئۆكراین، باسی لەوە كرد كە پێشبینی دەكەن هێرشەكە لە رێگەی سیستمی مووشەكیی S-300ەوە ئەنجام درابێت.
سەرۆكی فەرمانگەی سەربازیی ناوچەی خاركێڤ ئۆلیگ سینیگوبۆڤ لە لێدوانێكیدا باسی لەوە كرد لەنێو بریندارەكاندا كچێكی تەمەن ١٣ ساڵان هەیە.
