نێچیرڤان بارزانی و عەممار حەکیم کۆبوونەوە و هەڵبژاردنەکانی هەرێمی کوردستان و پەیوەندییەکانی نێوان هەرێم و بەغدایان تاووتوێکرد.
بەپێی راگەیەندراوی سەرۆکایەتی هەرێم، به‌يانيى ئه‌مڕۆ سێشه‌ممه نێچيرڤان بارزانى، سه‌رۆكى هه‌رێمى كوردستان، له ديدارێكدا له هه‌ولێر لەگەڵ عه‌ممار حه‌كيم، سه‌رۆكى ڕه‌وتى حيكمه‌ى نيشتمانيى عێراقى، هه‌ڵبژاردنه‌كانى په‌رله‌مانى كوردستان و ئه‌نجامه‌كانى تاوتوێ كرد، عەممار حه‌كيم، پيرۆزباييى سه‌ركه‌وتنى هه‌ڵبژاردنى له سه‌رۆك نێچيرڤان بارزانى كرد و، لەباره‌ى په‌يوه‌ندييه‌كانى هه‌ولێر ـ به‌غدا و دۆخى ناوچه‌كەش، بيروڕايان گۆڕييه‌وه.
ئەوەش هاتووە: هه‌ردوولا جه‌ختيان له‌سه‌ر گرنگيى به‌رده‌واميى گفتوگۆى هه‌ولێرـ به‌غدا كرده‌وه و هاوڕا بوون كه چاره‌سه‌ركردنى كێشه‌كان به لێكگه‌يشتن و له‌سه‌ر بنه‌ماى ده‌ستوور، ده‌بێته هۆى پته‌وكردنى ئارامى و سه‌قامگيريى زياترى عێراق.
بەپێی راگەیەندراوەکەی سەرۆکایەتی هەرێم، لە دیدارەکەدا كارى پێكه‌وه‌يى و هاريكاريى نێوان هێز و لايه‌نه سياسييه‌كان و پێكهاته‌كانى عێراقيان له‌پێناو به‌رژه‌وه‌نديى باڵاى وڵاتدا، به پێويست له قه‌ڵه‌م دا.
هاوکات هه‌ردوولا داكۆكييان له‌وه كرده‌وه كه پێويسته هه‌موو لايه‌ك كار بۆ ئه‌وه بكه‌ن ئارامى و سه‌قامگيرى له رۆژهه‌ڵاتى ناوه‌ڕاست بپارێزرێت، به هيچ شێوه‌يه‌ك عێراق له ئاڵۆزييه‌كانى ناوچه‌كه‌وه نه‌گلێت و له لێكه‌وته‌كانى به‌دوور بێت.
