ئەمیری کۆمەڵی دادگەری بەشدارینەکردنی حزبەکەی لە پەرلەمان ڕاگەیاند و دەڵێت” ئەو سێ کورسییەمان ناوێت کە پێمان دراوە”.
عەلی باپیر ئەمیری کۆمەڵی دادگەری لە کۆنفرانسێکی ڕۆژنامەوانیدا ڕایگەیاند، سوپاسی خەڵکی کوردستان دەکەین کە بە گەرموگوڕی بەشدارییان لە دەنگدان کرد و ڕێژەیەکی باشی بەشداری هەبوون و خودا پاداشتیان بداتەوە.
ئاماژەی بەوەشدا، لە ئیسلامدا گەڕانەوە بۆ بۆچوونی خەڵک بناغەیەکی پتەوە و مافی خەڵکە بەرپرسانی خۆی دانێ لە دەسەڵاتی یاسادانان و جێبەجێکردندا، و دوای دڵنیابونمان بە ڕێژەی ٪100 کە ساختەکاری زۆر لە دەرئەنجامی هەڵبژاردنەکان کراوە و پێدەچێت لە دەرەوەی عێراق ئەو کارە کرابێت بۆیە ئەنجامەکە ڕەتدەکەینەوە.
وتیشی، بۆ بەرگریکردن لە دەنگ و خەڵکی خۆمان و بۆ هۆشداریدان بە دەسەڵاتداران بە پێویستی دەزانین ڕایبگەیەنێن کە ناچینە نێو پەرلەمانێکەوە دەستی ساختە و تەزویری زۆری تێدابێت.
ڕاشیگەیاند، ئێمە لە بانگەشەدا باسی ئەوەمان کرد کە چاوەڕێدەکرێت پاکی و دەستی پاکی تێدابێت، بەڵام قسەکانی کۆمسیۆن ڕاست دەرنەچوو و تێڕوانینەکانی ئێمە بەرامبەریان وانەبوو.
وتیشی، حکومڕانانی هەرێم با چاک بزانن بە تەزویر و ساختەکاری براوەنین بەڵکو دۆڕاوی ڕاستین، ئەوەش خەڵک یاتر نائومێد و بی هیوا دەکات، و ئۆباڵەکەشی خۆیان دەیکێشن و لە ئەستۆی ئەوانە.
عەلی باپیر جەختیشیکردەوە، ئەمە مانای ئەوە نییە کە لە پرۆسەی کاری سیاسیدا نابین، چونکە تەنها پەرلەمان و حکموت بوار نییە بۆ کارەکانمان، بەڵکو لەدەرەوە کارەکانمان دەکەین و بە شایستەی خۆمانی نازانین کە بەشداری لەو حکومەتەدا بکەین.
ڕوونیشیکردەوە، ئێمە دەنگمان زۆر لەوە زیاترە کە ڕاگەیەندراوە و ناچینە پەرلەمان ، و چاوەڕوانین لەسەرجەم ئەو لایەنانەی کە وەک ئێمە ناڕازین و سەرنجیان هەیە هەمان هەڵوێستی ئێمە بگرنەبەر و پرسیار و نیشانە بخەینە سەر ئەم پرۆسەیە، و دواتر کۆمسیۆن و چاودێران بریار بدەن ، هیوادارم بەدەستی خۆمان زیاتر وڵاتمان بنکۆڵ نەکەین.
