ئەمڕۆ پێنجشەممە وەزارەتی دەرەوەی ئەمریکا ڕایگەیاند، ویلایەتە یەكگرتووەكان زۆر نیگەرانە لە هێرشەكانی سەر رۆژئاوای كوردستان، كە كاریگەری لەسەر دانیشتوان و ژێرخانی ئەو ناوچەیەو ئۆپەراسیۆنەکانی هاوپەیمانان بۆ شكستی هەمیشەیی داعش هەیە.
وەزارەتی دەرەوەی ئەمریکا ڕایگەیاندووە، “ئاگاداری دۆخەکەین و لە نزیکەوە بەدواداچوون بۆ پێشهاتەکانی رۆژئاوای كوردستان دەکەین”.
ئاماژەی بەوەشکرد، پێویستە هەموو لایەنەکان رێز لە ناوچە ئارامەکان بگرن و بیانپارێزن.
هاوکات جەختیشیکردەوە، دەبێت چالاکییە توندوتیژییەکان کەمبكرێنەوە،لەو چوارچێوەیەشدا داوای وەستاندنی هێرشەكان و پاراستنی هاوڵاتییانی كرد.
ئەمەش لە کاتێکدایە دوێنێ چوارشەممەوە، تورکیا بۆردومانێكی توندی بە فڕۆكە و توپخانەكان كردۆتە سەر ناوچەكانی ڕۆژئاوای كوردستان، كە بۆتە هۆی زیانگەیاندن بە زۆرێك لە دامەزراوە خزمەتگوزارییەكان، و زیانی گیانی لێكەوتۆتەوە.
