سەرۆک کۆماری عێراق داوای رێزگرتن لە ئەنجامەکانی هەڵبژاردن و ئیرادەی خەڵك دەکات، پشتیوانی خۆی بۆ تەواوکردنی رێڕەوی دەستوری و دیموکراسی لەهەرێمی کوردستان دووپاتدەکاتەوە.
بەبۆنەی سەرکەوتنی هەڵبژاردنی پەرلەمان لە هەرێمی کوردستان، د. لەتیف رەشید، سەرۆک کۆماری عێراق رایگەیاند: “پیرۆزبایی لە گەلەکەمان لە هەرێمی کوردستان و سەرجەم لایەن و کوتلە سیاسییەکان دەکەین، کە بەشدارییان لەم مافە گرنگە دیموکراسیەدا کردووە، هەروەها پیشەییبونی تەواو و دەستپاکی کۆمسیۆنی باڵای سەربەخۆی هەڵبژاردنەکان لەبەڕێوەبردنی پرۆسەی هەڵبژاردندا بەرزدەنرخێنین”.
داوای لە سەرجەم لایەنە سیاسییەکانیش کردووە، لەسەر مێزی دیالۆگی نیشتمانی بنیاتنەرانە کۆببنەوە لەپێناو پێکهێنانی حکومەتی هەرێم لەسەر بنەمای خزمەتی خەڵك و کارکردن بۆ برەودان بە پرۆسەی بنیاتنان و ئاوەدانکردنەوە و بوژاندنەوەی ئابووری و بەدیهێنانی گەشەپێدانی بەردەوام.
ئەوەشی وتووە: “هەڵبژاردن جگەلەوەی مافێکی دەستوریی بنەڕەتییە، کۆڵەکەیەکی سەرەکییە لە سیستمی دیموکراسیی پەرلەمانیی ئیتیحادیمان، هەروەها جێگای شانازییە بۆ هەموو عێراقییەکان”.
ئەوەش هاتووە: سەرۆکایەتی کۆمار داوای رێزگرتن لە ئەنجامەکانی هەڵبژاردن و ئیرادەی ئازادیی خەڵك دەکات، هەروەها پشتیوانی خۆی بۆ تەواوکردنی رێڕەوی دەستوری و دیموکراسی لەهەرێمی کوردستان دوپاتدەکاتەوە بەجۆرێك یەکڕیزیی نیشتمانی بەهێزبکات و خواستی گەلەکەمان بۆ گەشەپێدان و خۆشگوزەرانی و پێشکەوتن بەدیبهێنێت.
