وتەبێژی خانەنشینانی کوردستان رایدەگەیەنێت، “ئەوانەی قۆناغی دووەمی ھاوتاکردنی خانەنشینان دەیانگرێتەوە پێش ساڵی 2014 مووچەی مانگی 11 بە ھاوتاکراوی وەردەگرن”.
سادق عوسمان، وتەبێژی خانەنشینانی کوردستان بە “تۆڕی میدیایی خەڵک”ی راگەیاند: “لە ئێستادا ئەو لیژنەھاوبەشەی کە لە سێ ئەندامی حکومەتی ھەرێم و چوار ئەندامی حکومەتی عیراق پێکھاتووە، کار لەسەر جێبەجێکردنی بڕیار و خاڵەکانی یاسای ژمارە نۆی خانەنشینی عیراق دەکەن”.
وتبێژی خانەنشینانی کوردستان باسی لەوەشکرد: “بۆ ئێستا چەند بڕگەیەکی جێبەجێکراوە و ھەندێک لە خاڵەكانیان تێپەڕاندووە، وەک قۆناغی یەکەمی ھاوتاکردنی خانەنشینان و لێبڕینی خانەنشینی لە مووچە کە لە 7%ەوە کرا بە 10%”.
ئەوەشی خستەڕوو، “ئێستاش کار لەسەر ئەوە دەکەن کە تەمەنی خانەنشینی بکرێت بە 60 ساڵی یان 63 ساڵی، ھەروەھا قۆناغی دووەمی خانەنشینان کە ئەوانەی پێش ساڵی 2014 دەگرێتەوە و ھێشتا رێنماییەکان بە تەواوی نەھاتووە، بۆیە لیژنەکە کار لەسەر ئەوە دەکەن، دەنگۆی ئەوەش ھەیە مووچەی مانگی 11 بەھاوتاکراوی پێیان دەدرێت”.
