بەڕێوەبەری ئۆفیسی هەولێری کۆمسیۆن پرۆسەی دەنگدانی بە پرۆسەیەکی سەرکەوتوو ناوبرد و دەڵێت” دوای تەواوبوونی ماوەی یاسایی بژاردنی دەنگەکان دەستپێدەکات”.
مەروان محەممەد، بەڕێوبەری ئۆفیسی کۆمسیۆن لە هەولێر لە کۆنفرانسێکی ڕۆژنامەوانیدا ڕایگەیاند، پرۆسەی دەنگدان ئەمڕۆ بەشێوەیەکی سەرکەوتووانە بەڕێوەدەچێت و هیچ پێشێلکارییەک تۆمارنەکراوە، هاوکات ڕێکاری یاسایی بەرامبەر ئەو کەسانە دەگیرێتەبەر کە ئەمڕۆ بانگەشەی هەڵبژاردنیان کردووە.
ئاماژەی بەوەشدا، کەمترین سکاڵا تۆمارکراوە و لە هیچ بنکەیەکی دەنگدان کامێراکانی چاودێری نەوەستاوە و کاردەکەن.
سەبارەت بە گرفتی نەخێندنەوەی پەنجەمۆری بەشێک لە دەنگدەران، مەروان محەمەد ڕایگەیاند، ئەوانەی گرفتی پەنجەمۆریان هەیە بەنزیکەیی ڕێژەی 5٪ بووە، و ئەوانەی پێش دەنگدان گرفتیان هەبووە و سەردانی بنکەکانیان کردووە گرفتەکەیان چارەسەر کراون، ئێمە هەموو هەوڵێک دەدەین بەڵام هیچ کەسێک ناتوانێت بەبێ پەنجەمۆر دەنگ بدات.
ئاماژەی بەوەشدا، بابەتی هێنانە ژورەوە و هەڵگرتنی مۆبایل ڕێکارێکی نوێیە، بۆیە پێویستە لە هەڵبژاردنی گشتی دەنگدەران پابەندبن بە نەهێنانی مۆبایل.
کۆمسیۆن ڕوونیشیکردەوە، کاتژمێر 6ـی ئێوارە پرۆسەی دەنگدان کۆتاییدێت و دوای تەواوبوونی کاتی دەنگدان دەست بە ژماردنی دەنگ و بڵاوکردنەوەی ئەنجامە بەراییەکان دەکرێت.
