لەگەڵ دەستپێكردنی هەر پڕۆسەیەكی هەڵبژاردن لە هەرێمی كوردستان، هاووڵاتیان لەو ناوچانەی بە زیادەڕۆ هەژمار دەكرێن و تەنها فۆڕمیان هەیە و بێ تاپۆن دەست دەكەن بە دروست كردنی خانوو و یەكەی نیشتەجێبووون بە تایبەت لە ماوەی بانگەشەی هەڵبژاردندا و پۆلیسی ڕاپەڕین دەڵێت: هاوڵاتییان بانگەشەی هەڵبژاردن بە هەل دەزانن بۆ ئەنجامدانی زیادەڕۆیی.
بەڕێوەبەرایەتی پۆلیسی ڕاپەڕین بڵاویکردەوە، بەیانی ئەمڕۆ شەممە، هێزەکانمان بۆ ڕووخاندنی خانوویەکی زیادەڕۆ ڕۆیشتن و دەرکەوت تۆمەتبار شەوەکەی سەقفی بەستووە و کۆنکرێتیان کردووە.
ڕاشیگەیاندووە، دوای گەیشتنی هێزەکانیان، خانووەکە بە ئامێرەکانی شارەوانی ڕانیە ڕوخێندراوە و تۆمەتباران بۆ شوێنێکی نادیار هەڵهاتوون، بەڵام لێکۆڵینەوە بەردەوامە.
پۆلیسی ڕاپەڕین دەشڵێت: هێزەکانیان سەرقاڵی پڕۆسەی هەڵبژاردنن، خەڵکانێکی هەلپەرست بە هەلی دەزانن زیادەڕۆیی بکەنە سەر موڵک و ماڵی گشتی و خانوو بەزیادەڕۆیی دروست بکەن.
ئەمە لەكاتێكدایە، كە لە كۆتایی مانگی ڕابردووەوە بانگەشەی هەڵبژاردن بۆ پەرلەمانی كوردستان دەستی پێكردووە و لە بەشێكی شار و شارۆچكەكان لەو ماوەیەدا هاووڵاتیان بارودۆخەكە دەقۆزنەوە بۆ دروست كردنی خانوو لەسەر ئەو زەوییانەی كڕیویانە، بەڵام بەهۆی نەبوونی وێنەی تۆمار (تاپۆ)وە لەلایەن شارەوانییەوە ڕێگە بە دروست كردنیان نادرێت.
