قوباد تاڵەبانی رایگەیاند، یەکەم بوون بە باڵای سلێمانیدا بڕاوە و هەردەبێت لە هەموو شتێکدا یەکەم بێت و بە هەموومانەوە باشتریشی دەکەین.
ئەمڕۆ چوارشەممە زانکۆی سلێمانی رایگەیاند، بەپێی ریزبەندییەکی دامەزراوەی تایمزی بەریتانی، زانکۆی سلێمانی لەسەر ئاستی عێراق پلەی یەکەمی سەرجەم زانکۆ حکومییەکانی بەدەستهێناوە و کێبڕکێکە لەنێوان ٢١ زانکۆدا بووە، کە سەرجەم مەرجەکانی دامەزراوەکەیان تێدا بووبێت.
قوباد تاڵەبانی لەبارەی یەکەمبوونی زانکۆی سلێمانییەوە پیرۆزبایی لە زانکۆی دایک، زانکۆی سلێمانی دەکات و دەڵێت:”بەدەستهێنانی پلەی یەکەم لەسەر ئاستی هەموو زانکۆکانی عێراق، شانازی و سەروەرییەکی دیکەیە بۆ زانکۆی سلێمانی و شاری سلێمانی. سوپاس بۆ سەرۆکایەتیی زانکۆ و هەموو مامۆستایانی دڵسۆز و خوێندکارانی ئازیزی زانکۆی سلێمانی، سەربەرزتان کردین”.
دەشڵێت:”یەکەم بوون بە باڵای سلێمانیدا بڕاوە و هەردەبێت لە هەموو شتێکدا یەکەم بێت، بە هەموومانەوە باشتریشی دەکەین”.
