لەگەڵ زیادبوونی ئەگەرەکانی هێرشی ئیسرائیل بۆ سەر پێگەی میلیشیا شیعەکانی سەر بە ئێران، ئەندامێکی لیژنەی ئاسایش و بەرگری ئەنجومەنی نوێنەران ڕایگەیاند، هێزە ئەمنی و سەربازییەکان لە ئامادەباشیدان بۆ ڕووبەڕووبوونەوەی هەر دەستدرێژی و پێشێلکارییەک کە بکرێتە سەر خاکی عێراق.
ئەمڕۆ سێشەممە، محەمەد رومەیسی، ئەندامی لیژنەی ئاسایش و بەرگری ئەنجومەنی نوێنەران بە ڕۆژنامەی سەباحی ڕاگەیاند، لیژنەکەیان لەگەڵ سوپاسالار و یاریدەدەرەکەی، فەرماندەی فڕۆکەوانیی سوپا، فەرماندەی هێزی وشکانی. فەرماندەی بەرگریی ئاسمانیی، فەرماندەی هێزی ئاسمانیی، بەڕێوەبەری گشتیی هەواڵگریی و بەڕێوەبەری گشتیی پلاندانای وەزارەتی بەرگریی کۆبووەوە.
ئەوەشی خستەڕوو کە ئەنجامی کۆبوونەوەکە زۆر باش بووە و تێیدا تواناکانی عێراق بۆ بەرەنگاربوونەوەی هەر پێشێلکارییەکی ئاسمانیی خراوەتەڕوو و وتیشی: “ورەی سەرجەم فەرماندە و سەربازەکان بەرزە بۆ بەرەنگاربوونەوەی هەر مەترسییەک کە ئێستا و لە ئایندەدا ڕووبەڕووی عێراق ببێتەوە”.
لای خۆشیەوە عەدنان کینانی، شارەزای سەربازیی ڕایگەیاند، بیروباوەڕی سەربازیی سوپای عێراق بەرگریکارییە، بۆیە دەبینین هەمیشە لەوپەڕی ئامادەباشیدایە بۆ بەرەنگاربوونەوەی هەر دەستدرێژییەک.
