سەرۆک وەزیرانی هەرێمی کوردستان جەخت لە ئەنجامدانی هەڵبژاردنی پەرلەمانی کوردستان لە کەشێکی ئارام و دوور لە پێشێلکاری کردەوە.
مەسرور بارزانی، سەرۆک وەزیرانی هەرێمی کوردستان ڕایگەیاند، ئەمڕۆ دووشەممە پێشوازی لە ئیلبروس کوتراشیڤ باڵیۆزی ڕووسیا لە عێراق کرد و لە دیدارێکدا “بیروڕامان لەبارەی پەرەپێدانی پەیوەندییەکانی هەرێمی کوردستان و ڕووسیا و دوایین پەرەسەندن و پێشهاتەکانی بارودۆخی گشتی عێراق و ناوچەکە ئاڵوگۆڕ کرد”.
وتیشی: “باسمان لە ئامادەکارییەکانی هەڵبژاردنی پەرلەمانی کوردستان کرد و جەختمان لە گرنگیی ئەنجامدانی پرۆسەکە لە کەشێکی ئارام و دوور لە پێشێلکاری کردەوە”.
سەرۆک وەزیرانی هەرێمی کوردستان ڕاشیگەیاند، پێویستیی چارەسەرکردنی کێشەکانی هەرێمی کوردستان و حکومەتی فیدرال و دابینکردنی مافە دەستوورییەکانی هەرێمی کوردستان، تەوەرێکی دیکەی گفتوگۆکانمان بوو.
بڕیارە ڕۆژی 20ی تشرینی یەکەم هەڵبژاردنی خولی شەشەمی پەرلەمانی کوردستان بەڕێوەبچێت.
