بەپێیی ڕاپۆرت و پێشبینی شارەزایانی بواری كەشناسی، شەپۆلێكی باران بارینی بەخوڕ و تەرزە و هەورە بروسكە ناوچەكانی هەرێم دەگرێتەوە و لە بەشێكی ناوچەكان ئاستی دابارین دەگاتە زیاتر لە 40 ملم و دەبێتە هۆی دروست بوونی لافاو.
ئاراس جەبار، شارەزای كەشناسی بۆ (خەڵك) ڕایگەیاند، چالاکی بای بەھێزی باکوری ڕۆژھەڵات لە سبەی ئێوارەوە کەمدەبێتەوە و نیوەرۆی رۆژی دوو شەممە 30/9/2024 کۆتایی پێدێت، ھەر لەگەڵ کۆتایی ھاتنی با پێشبینی ئەکرێت پاڵەپەستۆیەکی نزمی ھەوا بە بارستە ھەوایەکی شێدارەوە لە باشوری وڵاتی ئەوروپاوە جوڵە بکات بە سەر ناوچەکانی وڵاتی تورکیا و باکوری کوردستان و لەنێوان ئێوارەی ڕۆژی سێ شەممە 1/10/2024 بۆ نیوەڕۆی ڕۆژی چوار شەممە 2/10/2024 چاوەروان دەکرێ کاریگەری ببێت لەسەر بەشێکی ناوچەکانی ھەرێمی کوردستان.
ڕاشیگەیاند، ئەو شەپۆلە خۆی ئەبینێتەوە لە حاڵەتێکی ناجێگیری کەش و بەرگەھەوا و چالاکبوونی با و ھەورە بروسکەی بەھێز و تاوە بارانی مامناوەند و بەخوڕ بەتایبەت بۆ سەر ناوچەکانی پارێزگای سلێمانی و ئیدارەی ڕاپەڕین و بەڕێژەیەکی کەمتریش بۆ سەر ناوچەکانی پارێزگای کەرکوک و ھەڵەبجە و باکووری گەرمیان و ئیدارەی سۆران کاریگەری ئەبێت .
وتیشی، “بەگشتی حاڵەتێکی خێرایە و ماوەکەی کورتە، کە ئێوارەی سێ شەممە دەستپێدەکات و نیوەڕۆی چوار شەممە 2/10/2024 کۆتایی پێدێت”.
سەبارەت بە ڕێژەی باران پێشبینی ئەوەی كرد، “ڕێژەی بارانەکان بەگشتی بۆ زۆرینەی ئەو ناوچانە کەم بۆ مامناوەندە لەنێوان 2 تا 10 ملم و لەھەندێ شوێنیش بەتایبەت لەسنوری پارێزگای سلێمانی و ئیدارەی ڕاپەڕین ئەگەر ھەیە ھەورە بروسکەی بەھێز و توند چالاک ببێت و باران و تەرزەی بەخوڕی لێببارێت بەرێژەی 20 تا 45 ملم کە لە ئەنجامدا لەماوەیەکی کورتدا ببێتە ھۆی دروستبوونی لافاوی خێرا “.
