لیوا یەحیا رەسوڵ وتەبێژی فەرماندەی گشتی هێزە چەكدارەكانی عێراق، پلەی سوپای عێراق لەڕیزبەندی سوپا عەرەبی و جیهانییەكاندا
ڕایدەگەیەنێت و دەڵێت، سوپای عێراق لە ڕیزبەندی چوارەمی سوپای وڵاتانی عەرەبی و لە پلەی 34ی سوپاكانی جیهاندایە.
لیوا یەحیا رەسوڵ لە لێدوانێكی ڕۆژنامەوانیدا ڕایگەیاند:”بەپێی دوایین ڕاپرسی، سوپای عێراق توانی پلەی چوارەمی وڵاتانی عەرەبی و پلەی 34ی نێودەوڵەتی لەسەر ئاستی جیهان بەدەستبهێنێت”.
بە وتەی لیوا یەحیا ڕەسوڵ:”خواستی ئێمە ئەوەیە هەموو تواناكان لە بوارەكانی چەكسازیی و مەشقكردندا بۆ سوپا بخرێتەگەڕ، هەرچەندە سوپا توانای بەرپەرچدانەوەی هەموو ئەو هێرش و پەلامارانەی هەیە كە دەكرێنە سەر خاكی عێراق، لەئێستاشدا هێزە ئەمنییەكان بەدوای پاشماوەی چەكدارانی داعشدا دەگەڕێن و دەیانەوێت لە لە تەواوی خاكی عیراقدا بنبڕییان بكەن”.
سوپای عیراق لە 6ی كانوونی دووەمی 1921 دامەزرا و لەو دەمەشەوە تائێستا ئەو ڕێكەوتە وەك بۆنەیەكی نیشتمانی كراوەتە پشووی فەرمی.
