حەسەن نەسروڵا ئەمینداری گشتی حزبوڵای لوبنان ڕایگەیاند، نەخۆشخانەكانی لوبنان توانای لەخۆگرتنی بریندارەكانیان نییە و ژمارەیەك لە بریندارەكانمان گواستۆتەوە بۆ دیمەشق و تاران.
لەمیانی پێشکەشکردنی وتارێکدا بەبۆنەی ڕووداوەکانی دووڕۆژی ڕابردووی لوبنان، حەسەن نەسروڵا رایگەیاند، گومان لەوەدا نییە تووشی زەبرێکی کوشندەی مرۆیی و سەربازی گەورەمان بەرکەوت کە بەدرێژایی میژووی لوبنان شتی وای بەخۆیەوە نەدیوە.
ئاماژەی بەوەشدا، ئەوەی لە لوبنان رویدا لەلایەن ئیسرائیلەوە ئەنجامدراوە، تەقینەوەكان لەناو نەخۆشخانەكانیش روویداوە و ئیسرائیل خەڵكانی سڤیلی كردە ئامانج، ئێمەش دەزانین دوژمن لەڕووی تەکنەلۆجیاوە زۆر لە ئیمە باڵادەست ترە.
وتیشی، سوپاسی ئەو وڵاتانە دەكەین هاوكارییان كردین لەنێویشیاندا عێراق و ئێران، بە پێدانی کەرەستەی پزیشکی و هاوکاری پزیشکی، هەروەها لەخۆبردووی خەڵکی خۆمان لەبیر ناکەین لە بەهاناوەچوونی برینداران و بەخشینی خوێن بە نەخۆشخانەکان.
ئاماژەی بەوەشکرد، تەقینەوەكان لە یەك خولەكدا ئەنجامدراون و ئیسرائیل زیاتر لە چوار هەزار ئامێری تەقاندۆتەوە و ئەوەی ئیسرائیل ئەنجامیدا كۆمەڵكوژییە، و سەرجەم بەهاکانی تێپەڕاندووە.
حەسەن نەسرولڵا وتیشی، ئیسرائیل وەرەمی شێرپەنجەیە لە رۆژهەڵاتی ناوەڕاست دروستبووە.
