سەرۆكی نوێنەرایەتی حكومەتی هەرێمی كوردستان لە بەغدا ڕایدەگەیەنێت، هەفتەی داهاتوو دانوستانەكانی هەولێر و بەغدا دەستپێدەكەنەوە و شاندی حكومەتیش دەچێتەوە بەغدا، دەشڵێت،”لە ماوەی ١٠رۆژی داهاتوودا بڕی ٤٠٠ ملیارەكە دەگاتەهەرێمی كوردستان”.
فارس عیسا، سەرۆكی نوێنەرایەتی حكومەتی هەرێمی كوردستان لە بەغدا لە لێدوانێكی ڕۆژنامەوانیدا ڕایگەیاندووە، كە لیژنەكانی نێوان هەولێر و بەغدا بۆ چارەسەركردنی كێشەكان كارەكانیان گەیشتووەتە قۆناغی كۆتایی و ئەم هەفتەیەش شاندی حكومەت دەگەڕێتەوە بەغدا.
ئەو بەرپرسەی كورد لە بەغدا بۆ كوردستان ٢٤ ئاشكراشیكردووە، كە ناردنی بڕی ٤٠٠ ملیار دینار بە بڕیاری ئەنجوومەنی وەزیرانە و ئەمیندارێتی گشتیی ئەنجوومەنی وەزیران گشتاندنی بۆ كردووە، بۆیە پێشبینی دەكرێت لە ماوەی ١٠ رۆژی داهاتوودا ئەو بڕە پارەیە بگاتە هەرێمی كوردستان.
