پلەکانی گەرمی زیاتر دادەبەزن و یەکەم شەپۆلی باران بارینی لاواز بەشێك له ناوچەکانی هەرێمی کوردستان دەگرێتەوە.
سیروان ساڵح، شارەزای كەشناسی بۆ (خەڵك) ڕایگەیاند، لە سبەینێ سێ شەممەوە پلەکانی گەرمی چەند پلەیەکی تر دادەبەزن و لە نێوان کاتەکانی ئێوارەی ڕۆژی پێنج شەممەوە تاوەکو بەرەبەیانی شەممە بەهۆی کاریگەری ناوچەیەکی پەستان نزمی لاوازی دەریای ناوەڕاستەوە لە ناوچە کوێستانییەکان ئەگەری بڕێکی کەم باران هەیە.
ڕوونیشی كردەوە، لە پارێزگای دهۆک و ناوچە شاخاوییەکان ئەگەرهەیە زیاتر لە 5 ملم باران ببارێت، بەڵام لە ناوچەکانی تری هەرێمی کوردستان ئەگەری دڵۆپە بارانی کەم هەیە و ئەگەرهەیە بگاتە دەوروبەری 1 ملم.
ئاماژەی بەوەشكرد، لە بەشێکی ناوچەکانی گەرمیانیش لەو ماوەیەدا بۆ ماوەیەکی کورتخایەن ئەگەری بڕێکی کەم دڵۆپەباران هەیە و پلەکانی گەرمی دادەبەزن و کەشێکی پاییزی ناوچەکە دەگرێتەوە.
