سەرۆكی پارتی دیموكراتی كوردستان و باڵیۆزی ئەمریكا لە عێراق كۆبوونەوە و جەختیان لە بەڕێوەچوونی هەڵبژاردنی پەرلەمانی كوردستان لە كەشێكی ئازاد و دوور لە گرژی كردەوە.
پێشنیوەڕۆی ئەمڕۆ دوو شەممە 9ی ئەیلوولی 2024 لە سەڵاحەددین مەسعود بارزانی، سەرۆكی پارتی دیموكراتی كوردستان پێشوازی لە ئەلینا ڕۆمانۆسكی، باڵیۆزی ئەمریكا لە عێراق كرد.
بەپێی ڕاگەیەنراوی بارەگای بارزانی، باڵیۆزی ئەمریكا لە عێراق ئاماژەی بە دەرئەنجامەكانی دوایین سەردانی بارزانی بۆ بەغدا كرد، كە كاریگەرییەكی زۆری هەبووە لەسەر ڕوانگەی لایەنە سیاسییەكانی عێراق و خوڵقاندنی كەشێكی ئیجابی بۆ مامەڵە لەگەڵ پرسە جیاجیاكان.
هەر لەو دیدارەدا باس لە بارودۆخی سیاسی عێراق و ناوچەكە و هەڵبژاردنەكانی پەرلەمانی كوردستان لە مانگی ئۆكتۆبەری داهاتوو و پێویستیی بەڕێوەچوونی كەمپێنەكان لە كەشێكی ئازاد و دوور لەگرژی كرا.
پرسی مانەوەی هێزە هاوپەیمانەكان لە عێراق و هەڕەشەكانی تیرۆر لەسەر عێراق و ناوچەكە تەوەری تری ئەو دیدارە بوون.
