ئەندامێكی مەكتەبی سیاسی پارتی دیموكراتی كوردستان ڕایدەگەیەنێت، كە زۆرینەی كورسی داهاتووی پەرلەمان بەدەستدەهێنێت و كابینەی 10 پێكدەهێنێت و دەشڵێت: مەسرور بارزانی سەرۆكی كابینەی داهاتووی حكومەتی هەرێم دەبێت.
هێمن هەورامی ، ئەندامی مەكتەبی سیاسی پارتی لە كۆنفڕانسێكی ڕۆژنامەوانیدا ڕایگەیاند، هیوادارین هەڵبژاردن بە ئارامی بەڕێوەبچێت و هەموومان بانگەشەمان لەسەر بەرنامەی هەڵبژاردن و خستنەڕووی ڕوئیای خۆی بێت نەك شەڕی ڕاگەیاندن، چونكە ئەوەی “بەردمان تێ بگرێت، ئێمە بەرقی تێدەگرین”.
ڕاشیگەیاند، پێكهێنانی حكومەت لەسەر ڕێككەوتن بووە و ئەوەش بەرپرسیارێتی هاوبەش بووە، بۆیە هیوادارین لە پێكهێنانی كابینەی داهاتوودا، كە هەر بە سەرۆكایەتی مەسرور بارزانی دەبێت ئەوەی جێگری سەرۆكی حكومەت و وەزیرەكان وەردەگرێت بە فعلی لەناو حكومەت بن.
وتیشی، “لە هەڵبژاردن زۆرینەی كورسییەكان بەدەست دەهێنن و كابینەی حكومەت لەلایەن پارتییەوە پێكدەهێنرێت و هەر مەسرور بارزانی سەرۆكی حكومەتی كابینەی 10 دەبێت”.
