دەستەی دەستپاکی عێراق ڕایگەیاند تەنها لە مانگی تەمووزی ڕابردوودا فەرمانی دەستگیرکردن و ڕاپێچکردنیان بۆ 36 بەرپرس دەرکردووە کە وەزیر و پەرلەمانتاری پێشووشیان لەنێودایە.
دەستەی دەستپاکی عێراق ڕایگەیاند مانگی تەمووزی ڕابردوو لە نووسینگەکانی لێکۆڵینەوەی دەستەکەیان لە بەغدا و پارێزگەکان، 36 فەرمانی دەستگیرکردن و ڕاپێچکردنیان بۆ 36 پلەی باڵا و تایبەت دەرکردووە.
ڕوونیشیکردەوە لە نێو ئەوانەی فەرمانیان بۆ دەرکراوە، دوو وەزیری پێشوو، بریکارێکی پێشووی وەزیر، پەرلەمانتارێکی پێشوو، شەش بەڕێوەبەری گشتی و 16 بەڕێوەبەری گشتیی پێشوو و چوار پارێزگاری پێشوو هەیە.
لەلایەکی دیکەشەوە دامەزراوەی نەهرەین بۆ پشتیوانیکردنی شەفافیەت و دەستپاکیی ڕایگەیاند، تا ئێستا بە تەواوی ژمارەی تۆمەتباران و بڕی ئەو پارەیە یەکلانەکراوەتەوە کە لە دۆسیەی “دزیی سەدە”دا دزراوە.
محەمەد ڕوبەیعی، سەرۆکی دامەزراوەکە ڕایگەیاند بە هۆی ئەوەی پارەکانی دزیی سەدە بۆ دەرەوەی عێراق حەواڵەکراوە، تا ئێستا ژمارەی تۆمەتبارەکان و بڕی پارەکەش بە تەواوی دیار نییە و لەو بڕوایەشدابوو لە ئایندەدا تۆمەتباری دیکە لە دۆسیەکەدا ئاشکرا بکرێت.
