بەهۆی ئاگرکوتنەوە لە دوو گوندی سەر بە ناوچەی شارباژێڕی سلێمانی، نزیكەی ٢٠٠ دۆنم پووش و پاوان و داری سروشتی و باخی هاووڵاتیان سووتان و کەسێکیش بە تۆمەتی هۆکاری ئاگرەکە دەستگیرکرا.
ئەمڕۆ یەکشەممە، بەڕێوەبەرایەتی پۆلیسی دارستان و ژینگەی سلێمانی بڵاویكردەوە، شەوی ڕابردوو ئاگرێك لە سنووری گوندەكانی “گۆڕەدێم و موبڕە” كەوتەوە و مەفرەزەیەكی بەشی پۆلیسی دارستانی شارباژێڕ گەیشتنە شوێنی ڕووداوەكە و بە هاوكاری ئاگركوژێنەوەی قەزای چوارتا و خەڵكی ناوچەكە توانیان كۆنترۆڵی بكەن.
ڕاشیگەیاند، بەهۆی ئاگرەكەوە نزیکەی ٢٠٠ دۆنم پووش و پاوان و داری سروشتی و چەند باخێکی هاووڵاتیان سوتان، هەروەها چەندین رەز و باخی دیكە لە سووتان پارێزران.
پۆلیسی دارستانی سلێمانی ئەوەشی خستەڕوو کە بە تۆمەتی كەوتنەوەی ئاگرەکە، هاووڵاتییەك دەستگیركراوە.
