هەرێمی کوردستان چەند ڕۆژێكی دیكە ماڵئاوایی لەشەپۆله گەرما چالاک و بەتینەکانی هاوین دەکات.
شاڵاو هیدایەت، شارەزای كەشناسی بۆ (خەڵك) ڕایگەیاند، پێشبینی دەكرێت لەناوەڕاستی ئەم هەفتەیە و بەولاوە بەتایبەتی نزمە پاڵەپەستۆی گەرمی وەرزی زەریای هیندی بەرەو ناچالاکی و کشانەوە بڕوات، کەساڵانە لەمانگەکانی (6 و 7 و 8) چالاک دەبێت بەڕووی ناوچەکاندا و دەبێتە ڕەخساندنی شەپۆلە گەرما چالاک و بەتین و بەهێزەکان بەسەر ناوچەکەماندا.
ڕاشیگەیاند، لەکۆتاییەکانی ئەم مانگە بەولاوە یەکەم کشانەوەی قۆناغی گەرمی هاوینی دەستپێدەکات و لەم قۆناغەدا کۆتایی بەشەپۆلە گەرما چالاکەکان دێت، کە دەبنه ڕەخساندنی گەرمای بێزارکەر و بەتین و ڕۆژانە تاڕادەیەک جیاوازی دەبێت و شەوانە تەواو جیاواز دەبێت بەجۆرێك له ناوچە نیمچەشاخاوی و دەشتایی و گەرمەسێرەکان کەش تەواو فێنک دەبێت و لەناوچە شاخاوی و کوێستانەکان کەشێکی فێنکتر بۆ تاڕادەیەک سارد دێتە ئاراوە.
وتیشی، “مانگی 9 لەڕووی گەرماوە مام ناوەند دەبێ بەرزترین پلەکانی گەرما لە سییەكاندا جێگیر دەبێت بەزۆری و نزمترین پلەکانی گەرماش تەواو دادەبەزێ و دێتە خوار بۆ پلەی بیستەكان و خوارتریش”.
ئاماژەی بەوەشكرد، مانگی 10 بەگشتی بەرزترین پلەکانی گەرما دێتە بیستەکان بەڕۆژ و لەهەندێ ناوچە و شوێنیش تا خوار بیستەکان و نزمترین پلەکانی گەرماش کەمتر دەبن و شەوانەی نیمچە سارد بۆ سارد دەبێت.
