جارێكی دیكە نرخی نەوتی سپی لە بەنزینخانە و گۆڕەپانەكانی نەوت فرۆشتن دابەزیوە و لە ئێستادا بەرمیلێك بە نزیكەی ٢٠٠ هەزار دینارە، كە هۆكارەكەشی دەگەڕێتەوە بۆ دابەشكردنی نەوت لەلایەن حكومەت و خێرخوازانەوە و هاوكات كەشوهەوای ئاسایی ئەمساڵیش زیاتر هۆكارە بۆ دابەزینی نرخەكەی.
لە سەرەتای پاییزی ئەمساڵدا نرخی بەرمیلێك نەوتی سپی گەیشتە ٢٨٠ هەزار دینار، بەڵام لەگەڵ دەستكردن بە دابەشكردنی نەوت بەسەر هاووڵاتیاندا لە ناوچە شاخاوییەكان، نرخەكەی ڕووی لە دابەزین كرد و لە ئێستاشدا، كە دەنگۆی دابەشكردنی لەناو شارەكاندا هەیە زیاتر نرخەكەی دابەزیوە، ئەمە سەرەڕای ئەوەی كەشوهەوای ئەمساڵ هێندە سارد و بەفر و بەستەڵەك نەبوو وەك ئەوەی سەرەتا پێشبینی دەكرا.
پەیامنێری (خەڵك) لە سلێمانی ڕایگەیاند، نرخی نەوت لە گۆڕەپانەكانی فرۆشتنی نەوت و بەنزینخانەكان ڕۆژ بەڕۆژ هەرزان دەبێت و لەماوەی ڕابردوودا لە ٢٨٠ هەزار دینارەوە بۆ بەرمیلێك دابەزی بۆ ٢٥٠ هەزار دینار و هەفتەی ڕابردووش بوو بە ٢٢٠ هەزار دینار.
ئاماژەی بەوەشكرد، دوێنێ و ئەمڕۆ زیاتر نرخەكەی دابەزیوە و بەرمیلێك نەوت بە گەیاندنەوە بۆ ماڵەوە بە ٢١٠ بۆ ٢١٥ هەزار دینارە.
وتیشی، “هەندێك لە بەنزینخانەكان لیترێك نەوتیان كردووە بە ١٠٠٠ دینار و هەندێكیشیان زیاتر هەرزانیان كردووە و لیتری بووە بە ٩٧٥ دینار و بەوەش نرخی یەك بەرمیلی ٢٠٠ لیتری دەكاتە ١٩٥ بۆ ٢٠٠ هەزار دینار”.
بە وتەی شارەزایانی بواری سووتەمەنی، هۆكاری دابەزینی نرخی نەوتی سپی زیاتر بۆ سێ هۆكار دەگەڕێتەوە، كە ئەوانیش بریتین لە دابەشكردنی نەوت لەلایەن حكومەتەوە بەسەر ناوچە شاخاوی و قەزا و ناحییەكان و هاوكات هەڵمەتی بەشێكی خێرخوازان و پەرلەمانتاران و حزبەكان بۆ دابەشكردنی نەوت.
بە وتەی شارەزایان، هۆكاری سێیەمی هەرزان بوونی نرخی نەوت دەگەڕێتەوە بۆ ئەوەی كەشوهەوای ئەمساڵ بەو جۆرە سەخت و سارد و بەفراوی نەبوو، كە لە سەرەتاوە پێشبینی دەكرا و ئەوە ڕاگەیەنرابوو، كە “زستانێكی سەخت بەڕێوەیە”.
لای خۆشیەوە، عەبدولستار مەجید، ئەندامی پەرلەمانی كوردستان بۆ (خەڵك) ڕایگەیاند، پشتیوان بە خوای گەورە و پاشان هاوكاری و پاڵپشتی خواپێداوان و خێرخوازان، ئەمساڵیش هاوشێوەی ساڵانی پێشوو، هێندەی لە تواناماندا هەبێ دەست دەكەین بە دابینكردنی نەوتی سپی بۆ ئەو ماڵ و خانەوادە هەژار و دەست كورتانەی، كە پێویستیان پێیەتی .
وتیشی، “چ ئەو كاتەی لە وەزارەت بووین، چ ئەم چەند ساڵەشی كە لە پەرلەمانین، پارەی گیرفانی خۆمان لەگەڵ خەڵكی خۆمان بەشكردووە و هیچ كات و لە هیچ قۆناغێكدا نەمانویستووە بەدیار نەبوونی و میحنەتی خەڵكەكەی خۆمانەوە دابنیشین و تەماشاكاری مەینەتییەكانیان بین”.
جەختیشی كردەوە، جگە لە پارەی حەڵاڵی خۆمان، پێمان عەیب نەبووە و لە پێناو پۆشتەكردنەوەی مناڵێكی بێباوك و نەخۆشێكی بێدەرەتان و خانەوادەیەكی هەژار، لە دەرگای هەندێ كەسی دۆست و دڵاوا و خێرخوازمان داوە و هاوكاریی و یارمەتیمان بۆ پەیدا كردوون .
