ڕاوکردنی ماسی لە بەنداوی دێوانەی دەربەندیخان تاوەکو ناوەڕاستی ساڵی داهاتوو قەدەغەکرا.
ئەمڕۆ یەکشەممە، بەڕێوەبەرایەتی پۆلیسی دارستان و ژینگەی پارێزگەی سلێمانی ڕایگەیاند، لە پێناو بوژاندنەوەو زیادکردنی ڕێژەی ماسی بڕیاردرا ڕاوکردنی ماسی لە بەنداوی دێوانەی قەزای دەربەندیخان تاوەکو 21ی 6ی 2025 قەدەغەبکرێت.
ڕوونیشکردەوە بەنداوی دێوانە بەنداوێکی نوێیە و ماوەی ساڵێکە پەنجە ماسی تێکراوە و ماسیەکانیش قەبارەیان بچوکە، بۆیە سێ ساڵیان پێویستە تا بە تەواوی پێبگەن و گەرا دابنێن، بە ڕاوکردنیشیان سامانی ماسی لە بەنداوەکەدا لەناودەچێت.
پۆلیسی دارستان و ژینگەی پارێزگەی سلێمانی ڕاشیگەیاند، لەو ماوەیەدا ڕاوکردن بە هەموو شێوەیەك قەدەغەیە تەنانەت بە قولاپ و تۆڕیش، بە پێچەوانەشەوە سەرپێچیکاران ڕووبەڕوی دادگا دەکرێنەوە.
داواشی لە هاووڵاتییان کرد کە پابەندی ڕێنماییەکان بن و خۆیان بە دوور بگرن لە ڕاوکردنی ماسی لەو بەنداوەدا.
