بەپێی ڕاپۆرتە كەشناسییەكان، شەپۆلی گەرمای بەتین ناوچەكانی هەرێم ناگرێتەوە و كەشێكی هاوینەی ئاسایی دەبێت تاوەكو كۆتایی ئەم مانگە و شارەزایەكی كەشناسی دەڵێت: باران و هەورەبروسكە لە كۆتاییەكانی ئەم مانگەدا هەرێم دەگرێتەوە.
ئاراس جەبار، شارەزای كەشناسی بۆ (خەڵك) ڕایگەیاند، بۆ ڕۆژانی داھاتوو تاوەكو کۆتایی مانگ بەگشتی گۆڕانکاریەکی ئەوتۆ لە پلەكانی گەرمادا لە ئارادا نیە و پێشبینی ناکرێت شەپۆلی بەتینی گەرما یان نزمبوونەوەیەکی بەرچاو و ھەستپێکراو بەسەر پلەی گەرمیدا بێت.
ڕوونیشی كردەوە، گەرمای ھاوینە لەناوچەکانمان بەشێوەیەکی ئاسایی بۆ کەمێک سەروو ئاسایی بەدرێژایی ئەم مانگە بەردەوامی ئەبێت و ھەندێک ڕۆژیش کەمێک نزمدەبێتەوە، بەڵام بەجۆرێک نابێت ھەست بە فێنکی یان گۆڕانکاری بکرێت .
وتیشی، “بەھۆی زیاتر چالاکبوونی بارانی وەرزی بۆ سەر ناوچەکانی باشووری نیمچە دوورگەی عەرەبی و باشووری ئێران و ھاتنی شێیەکی زۆر لەو ماوەیەدا ئەگەر ھەیە لە ڕۆژەکانی کۆتایی ئەم مانگەدا ھەورەبروسکە و بارانی بەخوڕ زیاتر بەرەو سەرەوە جووڵە بکات و ناوچەکانی باکووری ڕۆژئاوای سعودیەش بگرێتەوە و بە کاریگەرییەکی لاوازیش ھەر لەھەمان ماوەدا پێشبینی دەکرێت ئەو حاڵەتە بەلاوازی بگاتە ناوچەکانی عێراق و ھەرێمی کوردستان”.
ئاماژەی بەوەشكرد، لەو ماوەیەدا ئاسمان بەزۆری دەگۆرێت بۆ نیمچە ھەور لەگەڵ بارینی بارانێکی کەم لەھەندێ شوێندا و چالاکبوونی ھەورەبروسکە بەگشتی، بەڵام ئەو بارانە کاریگەری نابێت بۆ نزمبوونەوەی پلەی گەرمی.
