بەلەمێکی کۆچبەران بە زیاتر لە ٥٢ کۆچبەرەوە لەکاتی پەڕینەوەی بە کەناڵی ئینگلیزدا ژێرئاو کەوتووە و دوو کۆچبەر گیانیان لەدەستداوە.
دەیڤ پارێس، وتەبێژی حکومەتی بەریتانیا ڕایگەیاندووە، ئەمڕۆ بەلەمێکی کۆچبەران، کە زیاتر لە ٥٢ کۆچبەری تێدا بووە لەکاتی پەڕینەوەی بە کەناڵی ئینگلیزدا ژێرئاو کەوتووە و دوو کۆچبەر گیانیان لەدەستداوە و نزیکەی ٥٠ کۆچبەریش ڕزگار کراوان.
ڕاشیگەیاندووە، پەڕینەوە بە کەناڵەکەدا بە بەکارهێنانی بەلەمی بچووک مەترسیدارە و بەردەوامن لە هەوڵەکانیان بۆ هۆشیارکردنەوەی کۆچبەران لە بەکارنەهێنانی ئەو بەلەمانە و ڕێگریکردن لەو کەسانەی مامەڵە بە ژیانی کۆچبەرانەوە دەکەن.
هەر لە مانگەدا دوو ڕووداوی ژێرئاو کەوتنی بەلەم لە کەناڵی ئینگلیزیدا ڕوویانداوە، کە یەکێکیان ٨٥ کۆچبەری تێدا بووە و دووانیان گیانیان لەدەستدا و بەلەمەکەی دیکەش ٧١ کۆچبەری تێدا بووە و یەکێکیان گیانی لەدەستدا.
