کۆمپانیای بی ئێم دەبلیوی ئەڵمانی زیاتر لە ١٠٠ هەزار ئۆتۆمبێل لە ئەمریکا دەکشینێتەوە ئەمەش دوای دیاریکردنی کێشەیەک لە بزوێنەرەکەیدا.
بەڕێوەبەرایەتی سەلامەتی هاتووچۆی ڕێگاوبانی نیشتمانی ئەمریکا ڕۆژی پێنجشەممە ڕایگەیاند، بی ئێم دەبلیو 105 هەزار و 558 ئۆتۆمبێلی جۆری کرۆس ئۆڤەر و سیدان لە ئەمریکا دەکێشێتەوە و هەوڵی چارەسەرکردنی ئەو گرفتە دەدات کە لەبزوێنەرەکەیدا لەکاتی ئیشپێکردنیدا دروستبووە.
ڕاکێشانی ئۆتۆمبێلەکان چەند مۆدێلێک لەخۆدەگرێت، لەوانە هەندێک ئۆتۆمبێلی X5 و X7 و هەندێک مۆدێلی زنجیرەیی 3 و 7
بەڕێوەبەرایەتییەکە دەڵێت “بەپێی ئەو تاقیکردنەوانەی ئەنجام دراون بزوێنەری ئۆتۆمبێلەکان لەو چەند بەرهەمەی دیاریکراوە، لەکاتی هەوڵدان بۆ ئیشپێکردن و کوژاندنەوە و دووبارە هەڵکردنەوەی، پلەی گەرمی بزوێنەرەکان زۆر بەرزدەبێتەوە و مەترسی دروست دەکات، هۆکارەکەش بارگاوی بوونی زۆریەتی بە وزەی کارەبا”.
بەپێی بەڕێوەبەرایەتی سەلامەتی ئۆتۆمبێل، کۆمپانیاکە ئەو گرفتانەی ناو ئۆتۆمبێلەکان بەبێ بەرامبەر چارەسەر دەکەنەوە، پێشبینیش دەکرێت لە کۆتایی مانگی ئەیلولدا نامەی ئاگادارکردنەوە بۆ خاوەن ئۆتۆمبێلەکان بنێردرێت.
